တပ်မတော်အာဏာသိမ်းရေးကို ဦးတည်စေတဲ့ သတင်းအမှားတွေဟာပြီးခဲ့တဲ့နှစ်လကျော်ကတည်းက လူမှုကွန်ရက်ပေါ်မှာ အုံနဲ့ကျင်းနဲ့ပျံ့နှံ့ခဲ့ပါတယ်။ ပြီးခဲ့တဲ့ဒီဇင်ဘာလအစောပိုင်းကည်းက တပ်မတော်ကအာဏာသိမ်းမယ်လို့ တိုက်ရိုက်ရေးသားတဲ့သတင်းအမှားမြောက်များစွာကို Boom ကတွေ့ရှိခဲ့ပါတယ်။
Boom Myanmar က စိစစ်တွေ့ရှိတဲ့သတင်းအမှားတွေထဲမှာ အစောဆုံးသတင်းအနေနဲ့ တပ်မတော်ကတိုင်းပြည်ကိုနှစ်လအုပ်ချုပ်မယ်ဆိုတဲ့သတင်းအပါအဝင် အာဏာသိမ်းဖို့လှုံ့ဆော်ရေးသားတဲ့ သတင်းအမှားတွေကို ဒီဇင်ဘာလကတည်းကဖြန့်ဝေခဲ့ကြတာဖြစ်ပါတယ်။
တပ်မတော်က အာဏာမသိမ်းဘူးလို့ပြောလို့မရဘူးဆိုတဲ့ သတင်းစာရှင်လင်းပွဲမှာဖြေကြားချက်ထွက်မလာခင်အထိအာဏာသိမ်းရေးကို ဦးတည်စေတဲ့ သတင်းတု၊ သတင်းမှားတွေနဲ့ အဆိုပါဖြစ်စဉ်မျိုးကို ဆက်စပ်တွန်းပို့ပေးတဲ့ အကြောင်းအရာပေါင်းများစွာကိုလူမှုကွန်ရက်မှာချိန်သားကိုဖြန့်ဝေခဲ့ပါတယ်။
Boom Myanmar က အခုဝေမျှမယ့်အကြောင်းအရာတွေဟာ အထက်ကရည်ညွှန်းခဲ့တဲ့အကြောင်းအရာတွေအပါအဝင် တပ်မတော်အာဏာသိမ်းရေးကိုဖြစ်လာစေလိုတဲ့ဦးတည်ချက်တွေနဲ့ စတစ်တကျတွန်းပို့ဖို့ ဖန်တီးထားတဲ့ သတင်းတုသတင်းအမှားတွေကိုစုစည်းထားတာဖြစ်ပါတယ်။
ကာချုပ်က တိုင်းပြည်ကိုနှစ်လအုပ်ချုပ်မယ်ဆိုတဲ့ သတင်းအမှား
အဆိုပါ သတင်းအမှားကို ဒီဇင်ဘာလ ၂၆ ရက်နေ့ ကတည်းက အဲ့ဒေါဏီ ဆိုတဲ့ ဖေ့စ်ဘွတ်အကောင့်က စတင်ဖြန့်ဝေခဲ့တာဖြစ်ပါတယ်။ မူရင်းရေးသားမှုကို ဒီနေရာတွေမှာကြည့်ပါ။
အထက်ပါသတင်းမှားတွေထဲမှာအကိုးအကားနဲ့ ဖြစ်တန်ခြေအခိုင်အမာမရှိတဲ့ပြောဆိုရေးသားမှုတွေကိုထည့်သွင်းဖြန့်ဝေခဲ့ပြီးတပ်မတော်က အာဏာသိမ်းဖို့ဆိုတဲ့သိမှတ်မှုမျိုးကို လူထုကြားထဲစိမ့်ဝင်စေဖို့စတင်လာတာဖြစ်ပါတယ်။ Boom Myanmar က ဒီသတင်းကိုဆန်းစစ်ထားတဲ့အသေးစိတ် ရေးသားမှုကို ဒီလင့်မှာ ဝင်ရောက်လေ့လာနိုင်ပါတယ်။
သမ္မတ ကို ဖြုတ်ချလို့ ရကြောင်း တပ်ချုပ် ပြောတယ် ဆိုတဲ့သတင်းအမှား
အဆိုပါ သတင်းအတုဟာ ဒီဇင်ဘာလ ၁၃ ရက်နေ့ ကတည်းကလူမှုကွန်ရက်မှာလူအမြောက်အများဖြန့်ဝေခဲ့တာဖြစ်ပြီး တပ်မတော်ထောက်ခံသူတွေကြားထဲမှာ အများဆုံးဖြန့်ဝေခဲ့ကြတာဖြစ်ပါတယ်။ အစိမ်းရောင် နောက်ခံအရောင်နဲ့ပြုလုပ်ထားတဲ့အပေါ် "တာဝန်မကျေတဲ့ သမ္မတအား စွပ်စွဲအပြစ်တင်ဖြုတ်ချလို့ရကြောင်း ဥပဒေအတိုင်း တပ်ချုပ်ကြီး ပြောပါပြီ" လို့ ရေးသားထားပါတယ်။
ဖေ့စ်ဘွတ်အကောင့်ပေါင်းခြောက်ရာကျော်ကထပ်ဆင့်ဝေမျှကြတဲ့အဆိုပါသတင်းအမှားဟာ ကာကွယ်ရေးဦးစီးချုပ်လုံး၀ပြောဆိုထားခြင်းမရှိတဲ့အကြောင်းအရာကို ရည်ရွယ်ချက်ရှိရှိဖြန့်ဝေခဲ့ကြတာဖြစ်ပါတယ်။မူရင်းဖြန့်ဝေခဲ့တဲ့အကြောင်းအရာတွေကို ဒီမှာကြည့်ပါ။
ဒီအကြောင်းအရာပေါ် Boom ကဆန်းစစ်ထားတဲ့ သတင်းရေးသားချက်ကို ဒီမှာကြည့်ပါ။
တပ်မတော်က ယာယီအာဏာသိမ်းတယ်ဆိုတဲ့ သတင်းအမှား
အထက်ပါသတင်းအမှားနှစ်ပုဒ်စလုံးမှာ တပ်မတော်က အာဏာသိမ်းမယ်လို့ သိမှတ်မှားစေနိုင်တဲ့ ဖြန့်ဝေမှုတွေကို ဦးတည်ပြုလုပ်ခဲ့တာဖြစ်ပြီးဒီလုပ်ဆောင်ချက်တွေကို အရှိန်မြင့်တဲ့ရေးသားဖြန့်ဝေမှုတွေက သတင်းစာရှင်းလင်းပွဲမတိုင်မီ ဇန္နဝါရီလဆန်းမှာ ဆက်လက်ထွက်ပေါ်လာပါတယ်။
ဒီလိုသတင်းအမှားမျိုးကိုအကောင့်ပုန်းအကောင့်တုတွေနဲ့သာမကပြည်ခိုင်ဖြိုးပါတီလွှတ်တော်ကိုယ်စားလှယ်နဲ့ဆက်စပ်သူတွေဆီကပါလူသိရှင်ကြားစတင်ဖြန့်ဝေလာပါတယ်။ ဒလမြို့နယ် ပြည်ခိုင်ဖြိုးပါတီကလွှတ်တော်ကိုယ်စားလှယ်လောင်းရဲ့ ကိုယ်စားလှယ် ဒေါ်တင်တင်စိုးက ၎င်းရဲ့ ဖေ့စ်ဘွတ်စာမျက်နှာပေါ်မှာ ဒီအကြောင်းအရာကိုပါ Live လွှင့်ပြောဆိုခဲ့ပါတယ်။
"အစိမ်းကို ချစ်သောအားဖြင့် ဒီည ၁၂ နာရီမှာ တပ်မတော်က အာဏာသိမ်းလိုက်ပြီ။ ဟေ့ရှင်းလား ပျော်လားဟေ့၊ မတရားသဖြင့် လုပ်တာမဟုတ်ဘူး ခြေ/ဥနဲ့လုပ်သွားတာ၊ ပျော်သလားဟေ့မောင်တို့ရေ" ဆိုပြီး သူ့ရဲ Live မှာပြောဆိုသွားခဲ့တာဖြစ်ပါတယ်။
ဒီအကြောင်းအရာအသေးစိတ်နဲ့ပတ်သက်တဲ့ သတင်းတင်ပြချက်ကို ဒီလင့်မှာ ဝင်ရောက်လေ့လာပါ။
ရန်ကုန်မှာ တင့်နဲ့သံချပ်ကားရှစ်ဆယ်ကျော်ဖြန့်ကျက်ထားတယ်ဆိုတဲ့ သတင်းအမှား
ရန်ကုန်နဲ့တခြားနယ်မြို့တွေမှာ တင့်ကားတွေ ဟန်ရေးပြသွားလာခဲ့တာတွေရှိခဲ့ပေမယ့် ဒီအကြောင်းအရာမှာထည့်သွင်းဖြန့်ဝေသလိုအစီးရေ ရှစ်ဆယ်ကျော်ဖြန့်ကျက်ထားတယ်ဆိုတဲ့အချက်အလက်မမှန်ကန်ပါဘူး။ ဒီသတင်းအမှားကိုတော့ အာဏာသိမ်းဖို့အခြေအနေတွေကို ဦးတည်လာခဲ့တဲ့ပြီးခဲ့တဲ့ရက်ပိုင်းတွေဖြန့်ဝေတာဖြစ်ပါတယ်။ ဒီအကြောင်းအရာနဲ့ပတ်သက်တဲ့ဆန်းစစ်ရေးသားချက်ကို ဒီလင့်မှာဝင်ရောက်ဖတ်ရှုပါ။
အာဏာသိမ်းရေးဦးတည်စေဖို့ သတင်းအမှားတွေဖြန့်ဝေတဲ့ လှုပ်ရှားမှုတွေဟာ လနဲ့ချီပြင်ဆင်ပြီး လူထုကြားထဲကိုဦးစွာဖြန့်ဝေခဲ့သလို အဲ့ဒီအချက်အလက်မှားတွေနဲ့ရေးသားတဲ့အာဏာသိမ်းရေးဖြစ်စဉ်ဟာဇန္နဝါရီလကုန်ပိုင်းမှာတော့ အမှန်တကယ်လှုပ်လှုပ်ခတ်ခတ်ဖြစ်လာသလို တပ်မတော်ဖက်က တရားဝင်ထုတ်ဖေါ်ပြောဆိုမှုတွေဟာလည်း လူထုကြားထဲစိုးရိမ်ဖွယ်ရာဖြစ်လာစေခဲ့ပါတယ်။
တပ်မတော်အာဏာသိမ်းရေးကို တွန်းပို့ဖြန့်ဝေတဲ့သတင်းအမှားတွေထဲမှာတိုက်ရိုက်သူံးနှုန်းရေးသားတဲ့အရေးအသားတွေအပါအဝင် တပ်မတော်၊ UEC နဲ့အစိုးရကြားထဲ အခြေအနေတင်းမာစေဖို့လုပ်ကြံရေးသားတဲ့အကြောင်းအရာမြောက်များစွာလည်း လူမှုကွန်ရက်မှာနေ့စဉ်နဲ့အမျှထွက်ပေါ်ခဲ့ပါတယ်။ ဥပမာအားဖြင့် လူထုကြားထဲအချက်အလက်နဲ့ဖြစ်စဉ်အမှားတွေကို အမှန်တကယ်ထင်မှတ်သွားစေဖို့ရေးသားကြတဲ့ မဲခိုးဖို့ သမ္မတက ညွှန်ကြားခဲ့တယ်ဆိုတဲ့ သတင်းအတုတွေ၊ အစိုးရဝန်ထမ်း ၇၀ ကျော်ဖမ်းဆီးထားတယ်ဆိုတဲ့ သတင်းအမှားတွေဟာ အာဏာသိမ်းစေရေးဖြစ်စဉ်တွေကိုပံ့ပိုးစေတဲ့ သတင်းတု သတင်းမှားတွေ အဖြစ်နဲ့ချိတ်ဆက်ဖြန့်ဝေခဲ့တာဖြစ်ပါတယ်။