ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ Kanak Tavade ဆိုတဲ့ ဖေစ့်ဘွတ်ပေချ့်မှာ ဧပြီလ ၂၄ ရက်နေ့ နေ့လည်ပိုင်းမှာ စတင်ဖြန့်ဝေနေတာဖြစ်ပြီး ထပ်ဆင့်ဖြန့်ဝေမှု အများအပြားလည်း ရှိနေပါတယ်။
ဖြန့်ဝေရာမှာ ကြာချိန် ၈ မိနစ်နီးပါးရှိတဲ့ ဗွီဒီယိုဖိုင်တစ်ခုနဲ့အတူ ‘ဘန်ကီမွန်းနဲ့ အမေစု သီးသန့်တွေ့ဆုံ။ စစ်တပ်အမှားလို့ ဘန်ကီမွန်းပြော။ မအလ ခွေးဇာတ်ခင်းပြီ’ ဆိုတဲ့ခေါင်းစဉ်တွေနဲ့ ရေးသာထားတာပါ။ ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။
သတင်းဆန်းစစ်ချက်
The Elders အဖွဲ့ရဲ့ ဒုတိယဥက္ကဋ္ဌ ၊ ကုလသမဂ္ဂ အတွင်းရေးမှူးချုပ်ဟောင်း မစ္စတာဘန်ကီမွန်း မြန်မာနိုင်ငံကို ရုတ်တရက် လာရောက်ခဲ့ပြီး ဒီခရီးစဉ်နဲ့ ဆက်စပ်ပြီး လုပ်ကြံ ရေးသားထားတဲ့ အကြောင်းအရာတွေကို သတင်းအမှားတွေ ဖြန့်ဝေနေတဲ့ ဖေစ့်ဘွတ်ပေချ့်တွေမှာ ဆက်တိုက်တင်နေတာဖြစ်ပါတယ်။
ဖြန့်ဝေထားတဲ့ ဗွီဒီယိုဖိုင်ဟာ အခြားသတင်းဌာနတွေမှာ ဖော်ပြထားတဲ့ ကုလသမဂ္ဂ အတွင်းရေးမှူးချုပ်ဟောင်း မစ္စတာဘန်ကီမွန်းရဲ့ ခရီးစဉ်အကြောင်းကို နောက်ခံစကားပြောနဲ့ ပြန်လည်ပြုပြင်ထားတဲ့ ရုပ်သံဖိုင်ပဲ ဖြစ်ပါတယ်။
ဘန်ကီမွန်းရဲ့ ခရီးစဉ်ဟာ အကြမ်းဖက်မှုတွေ ချက်ချင်း ရပ်တန့်အောင် တိုက်တွန်းဖို့ မြန်မာပြည်ကို လာခဲ့တာဖြစ်ကြောင်း၊ သက်ဆိုင်သူ အားလုံးပါဝင်ပြီး အပြုသဘောဆောင်တဲ့ တွေ့ဆုံဆွေးနွေးရေး စတင်ဖို့ တိုက်တွန်းကြောင်း၊ မြန်မာပြည်သူတွေကို တတ်နိုင်သမျှကူညီဖို့ မြန်မာပြည်ကို လာခဲ့တာဖြစ်ကြောင်း၊ မြန်မာ့အရေး အာဆီယံ ဘုံသဘောတူညီချက် ၅ ရပ်အပြင် ကုလသမဂ္ဂ လုံခြုံရေးကောင်စီရဲ့ မြန်မာ့အရေး ဆုံးဖြတ်ချက်အမှတ် - ၂၆၆၉ ကို အမြန်ဆုံး အကောင်အထည် ဖော်နိုင်ရေး ဆွေးနွေးခဲ့တာဖြစ်ကြောင်း ဧပြီ ၂၅ ရက်က ထုတ်ပြန်တဲ့ The Elders အဖွဲ့ရဲ့ ကြေညာချက်ထဲမှာ ရေးသားထားပါတယ်။ သူ့ရဲ့ ခရီးစဉ်ထဲမှာ စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ သမ္မတဟောင်း ဦးသိန်းစိန်အပြင် တခြား စစ်ဘက်အရာရှိတွေနဲ့ တွေ့ဆုံခဲ့ပေမယ့် ဒေါ်အောင်ဆန်းစုကြည်နဲ့ တွေ့ဆုံတာ မရှိခဲ့ဘူးလို့ သတင်းဌာနတွေမှာ ဖော်ပြထားပါတယ်။
သတင်းအမှားဖြန့်ထားတဲ့ ပေ့ချ်တွေကို ဝင်ရောက်စစ်ဆေးကြည့်တဲ့အခါ ကြည့်ရှုသူအရေအတွက်များအောင် သတင်းခေါင်းစဉ်တွေမှာ လိမ်ညာပြီး ကြည့်ရှုသူအရေအတွက်ကနေ ဝင်ငွေပြန်ရနေတဲ့ Click baits သတင်းတွေ ဖြန့်နေတဲ့ အဖွဲ့ဖြစ်တာကို တွေ့ရပါတယ်။