ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ MN cele ဆိုတဲ့ ဖေစ့်ဘွတ်ပေချ့်မှာ ဖေဖေါ်ဝါရီ ၂၃ ရက်နေ့မှာ စတင်ဖြန့်ဝေခဲ့တာ ဖြစ်ပြီး ထပ်ဆင့်ဖြန့်ဝေမှု အများအပြားလည်း ရှိနေပါတယ်။
ဖြန့်ဝေရာမှာ ကြာချိန် ၇ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ ''ဗိုလ်နဂါး စစ်ကြောရေးမှာ မိသားစုလိုက် အသတ်ခံရ။ ပြည်သူတွေကို သစ္စာဖောက်လိုက်တဲ့ ဗိုလ်နဂါး တပ်တွင်း စစ်ဆေးခံနေရပြီး စစ်ကြောရေးမှာ သေဆုံးပြီဟု သတင်းထွက်' လို့ ရေးသားထားပါတယ်။
ဖြန့်ဝေမှုကို ဒီနေရာ၊ ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။
သတင်းဆန်းစစ်ချက်
ဗိုလ်နဂါး နဲ့ မိသားစု စစ်ကြောရေးမှာ အသတ်ခံရတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။
ဖြန့်ဝေထားတဲ့ ဗီဒီယိုထဲမှာ ဗိုလ်နဂါး စစ်တပ်ဆီ လက်နက်ချတယ်ဆိုတဲ့ အကြောင်းအရာနဲ့ ဆက်စပ်ပြီး ထင်မြင်ချက်တွေကို နောက်ခံစကားပြောနဲ့ ပြောဆိုထားတာသာ ဖြစ်ပါတယ်။
ဗိုလ်နဂါး နဲ့ မိသားစု စစ်ကြောရေးမှာ အသတ်ခံရတယ်ဆိုတဲ့ အကြောင်းအရာကို သက်ဆိုင်ရာ အဖွဲ့အစည်း၊ လူပုဂ္ဂိုလ် တွေဆီက ထုတ်ဖော်ပြောဆိုထားတာမျိုး မရှိသလို ယုံကြည်စိတ်ချရတဲ့ သတင်းဌာနတွေမှာလည်း ဖော်ပြမထားပါဘူး။
အခုဖြန့်ဝေနေတာတွေဟာ သတင်းအမှားတွေပဲ ဖြစ်ပါတယ်။
NUG လက်အောက်ခံ PDF ခရိုင်တပ်ရင်းတပ်ဖွဲ့တွေက BNRA ဂိတ်စခန်းတွေကို ဖေဖော်ဝါရီလ ၁၇ ရက်နေ့မှာ ဝင်ရောက်စီးနင်းပြီး နောက်တစ်ရက်မှာ ဗိုလ်နဂါးကို စစ်တပ်က ရဟတ်ယာဉ်နှင့် ကယ်ထုတ်သွားပြီးနောက် BNRA ထိပ်ပိုင်းခေါင်းဆောင်တွေ ဖြစ်တဲ့ ဒုတိယဥက္ကဋ္ဌနဲ့ စစ်ရေးတာဝန်ခံ အပါအဝင် တပ်ဖွဲ့ဝင် ငါးဦးလည်း စစ်တပ်ထံ ဘက်ပြောင်းသွားတယ်လို့ သိရပါတယ်။
လက်ရှိမှာ ဗိုလ်နဂါးအပါအဝင် BNRA တပ်ဖွဲ့ဝင်တွေကို သက်ငယ်မုဒိမ်းမှု၊ PDF တပ်ဖွဲ့ဝင်တွေကို သတ်ဖြတ်မှု၊ ပကဖ ရဲဘော်တွေကို နှိပ်စက်ညှဉ်းပန်းမှု အပါအဝင် အမှု ခုနစ်မှုနဲ့ တရားစွဲဆိုထားကြောင်း အမျိုးသား ညီညွတ်ရေးအစိုးရက ထုတ်ပြန်ထားပါတယ်။