အဆိုပါ သတင်းအတုကို TepPon News ဆိုတဲ့ ဖေ့စ်ဘွတ်ပေ့ချ်က ဇန်နဝါရီလ ၅ ရက်နေ့မှာ ဖြန့်ထားတာဖြစ်ပြီး သတင်းအမှားကို ဖြန့်ဝေရာမှာ ၁၀ မိနစ်ခွဲ ကြာမြင့်တဲ့ Video တစ်ပုဒ်နဲ့ တွဲတင်ထားတာဖြစ်ပါတယ်။ Video ရဲ့ နောက်ခံဓါတ်ပုံပေါ်မှာ စစ်ကောင်စီပြန်ကြားရေး ဇော်မင်းထွန်းရဲ့ ဓါတ်ပုံရယ်၊ ဝီရသူရဲ့ ဓါတ်ပုံရယ်ကို ပူးတွဲ ဖော်ပြထားပြီး သာသနာပျက်သုန်းပြီဖြစ်ကြောင်း ဝီရသူကို သာသနာရေးဝန်ကြီး ခန့်အပ်ထားကြောင်း ရေးသားထားပါတယ်။ ဒီ Video ကို လူမှုကွန်ယက်ပေါ် ဖြန့်ဝေရာမှာတော့ “ဦးဝီရသူကို သာသနာရေးဝန်ကြီးခန့်အပ်” ဆိုတဲ့ ခေါင်းစဉ်ကို ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာ နဲ့ ဒီနေရာမှ ကြည့်ပါ။ အဆိုပါ Video ကို like လုပ်ထားသူ ၁၃၀၀ ကျော်နဲ့ ဝင်ရောက်ကြည့်ရှု့ထားသူ ၅၇၀၀၀ ကျော်ရှိကာ တစ်ခြားဖေ့စ်ဘွတ်ပေ့ချ်တွေကလည်း ဖော်ပြထားကြပါတယ်။
သတင်းဆန်းစစ်ချက်
ဝီရသူကို သာသနာရေးဝန်ကြီးခန့်အပ်လိုက်တယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် လိမ်ညာရေးသားထားတဲ့ သတင်းအတုဖြစ်တာကို တွေ့ရပါတယ်။
စစ်ကောင်စီက ဝီရသူကို ဘွဲတံဆိပ်တွေ ဆုတံဆိပ်တွေ ပေးအပ်ခဲ့ပေမယ့် သာသနာရေးဝန်ကြီးရာထူးကိုတော့ ပေးအပ်ထားခြင်း မရှိပါဘူး။ လက်ရှိစစ်ကောင်စီရဲ့ သာသနာရေးဝန်ကြီးဟာ ဦးကိုကိုသာ ဖြစ်ပြီး လက်ရှိထိ စစ်ကောင်စီရဲ့ ပွဲတွေ အခမ်းအနားတွေ တက်ရောက်နေဆဲသာ ဖြစ်ပါတယ်။
သတင်းအမှား Video ထဲမှာ ဝီရသူကို သာသနာရေးဝန်ကြီးခန့်ထားတယ်လို့ ဆိုထားပေမယ့် Video အတွင်းမှာတော့ ဧရာဝတီသတင်းဌာနမှာ ဖော်ပြထားတဲ့ ဆောင်းပါးရှင် ဥဩရဲ့ “စစ်တပ်ရဲ့ တရားဝင်မှုနဲ့ အမျိုးဘာသာ သာသနာ” ဆိုတဲ့ ဆောင်းပါးကိုသာ ဖော်ထားပါတယ်။
သတင်းအမှားဖြန့်ထားတဲ့အဖွဲ့ကို ဝင်ရောက်စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် သတင်းခေါင်းစဉ်တွေမှာ လိမ်ညာရေးသားထားပြီး ကြည့်ရှု့သူအရေအတွက်နဲ့ ဝင်ငွေရှာနေတဲ့ Clickbaits သတင်းတွေ ဖြန့်နေတဲ့ အဖွဲ့ဖြစ်တာကို တွေ့ရပါတယ်။