အဆိုပါ သတင်းအတုကို Appreciate news ဆိုတဲ့ ဖေ့စ်ဘွတ်ပေ့ချ်က မတ်လ ၉ ရက်နေ့ ညပိုင်းမှာ တင်ထားတာဖြစ်ပြီး သတင်းအမှားကို ဖြန့်ဝေရာမှာ ၈ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာဖြစ်ပြီး Video ရဲ့ နောက်ခံဓါတ်ပုံပေါ်မှာ KNU ဥက္ကဌနဲ့ စစ်ဦးစီးချုပ်ပါဝင်တဲ့ ဓါတ်ပုံကို ဖော်ပြထားပြီး ဓါတ်ပုံအပေါ်မှာ KNU ဥက္ကဌနဲ့ စစ်ဦးစီးချုပ်ကားတန်း မိုင်းဆွဲခံရပြီး ခန္ဓာကိုယ်အပိုင်းပိုင်းပြတ်ကာ သေဆုံးသွားပြီလို့ ဖြန့်ဝေထားပါတယ်။ ဒီ Video ကို လူမှုကွန်ယက်ပေါ် ဖြန့်ဝေရာမှာတော့ KNU ဥက္ကဌနဲ့ စစ်ဦးစီးချုပ်ကားတန်းမိုင်းဆွဲခံရမှုကြောင့် ပွဲချင်းပြီး သေဆုံးသွားတယ်လို့ ထပ်မံရေးသားထားပါတယ်။
မူရင်းရေးသားဖြန့်ဝေမှုကို ဒီနေရာမှာ ကြည့်ပါ။
အဆိုပါ Video ကို Like လုပ်ထားသူ ၇၀၀ ကျော်နဲ့ ဝင်ရောက်ကြည့်ရှု့ထားသူ ၄၁၀၀၀ ကျော်ရှိကာ ထပ်ဆင့်ဝေမျှသူတွေလည်းရှိနေပါတယ်။
သတင်းဆန်းစစ်ချက်
KNU ဥက္ကဌနဲ့ စစ်ဦးစီးချုပ်လိုက်ပါ စီးနင်းလိုက်ပါလာတဲ့ယဉ်တန်း မိုင်းဆွဲတိုက်ခိုက်ခံရပြီး ပွဲချင်းပြီးသေဆုံးသွားတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
လွန်ခဲ့တဲ့ ရက်ပိုင်းအတွင်းက KNU ဥက္ကဌနဲ့ စစ်ဦးစီးချုပ်တို့ စီးနင်းလိုက်ပါလာတဲ့ ကားမိုင်းဆွဲခံရတယ်ဆိုတဲ့ သတင်းအမှားတွေ ထွက်ပေါ်ခဲ့ပါတယ်။ တကယ်တမ်းမိုင်းဆွဲခံရတဲ့ကားဟာ BGF တွေရဲ့ ယာဉ်တန်းဖြစ်ပြီး တစ်ဦးထိခိုက် ဒဏ်ရာရတယ်လို့ KNU ဗဟိုက တာဝန်ရှိသူ တစ်ဦးက ပြောကြားထားပါတယ်။
ကရင်ပြည်နယ် လှိုင်းဘွဲ့မြို့မှာ BGF ယာဉ်တန်း မိုင်းဆွဲခံရတဲ့ သတင်းကို ဒီနေရာမှာ ဖတ်ပါ။
ဒါ့အပြင့် သတင်းအမှားရဲ့ ခေါင်းစဉ်မှာ KNU ဥက္ကဌနဲ့ စစ်ဦးစီးချုပ်တို့ရဲ့ကားမိုင်းဆွဲခံရပြီး သေဆုံးသွားပြီလို့ ဆိုထားပေမယ့် သတင်းအတွင်းမှာတော့ လူထုနွေဦး သတင်းဌာနက ဖော်ပြထားတဲ့ ကားမိုင်းဆွဲခံရတာ သတင်းအမှားဖြစ်တယ်ဆိုတဲ့ သတင်းကိုသာ ပြန်လည်ဖော်ပြထားပါတယ်။
သတင်းအမှားဖြန့်ထားတဲ့ ဖေ့စ်ဘွတ်ပေ့ချ်ကို ဝင်ရောက်စစ်ဆေးကြည့်တဲ့အခါ ကြည့်ရှု့သူများအောင် သတင်းခေါင်းစဉ်တွေမှာ လိမ်ညာရေးသားပြီး ကြည့်ရှု့သူအရေအတွက်ကနေ ဝင်ငွေပြန်ရှာနေတဲ့ clickbaits သတင်းတွေ ဖြန့်နေတဲ့ အဖွဲ့ဖြစ်တာကို တွေ့ရပါတယ်။