အဆိုပါ သတင်းအတုကိုYouTube ချန်နယ်တစ်ခုက နိုဝင်ဘာလ ၁၁ ရက်နေ့မှာ ဖြန့်ထားတာ ဖြစ်ပြီး သတင်းအမှားကို ဖြန့်ဝေရာမှာ ၁၅ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာ ဖြစ်ပါတယ်။ ဒီ Video ရဲ့ နောက်ခံမှာ ပင်လယ်ပြင်မှာ တိုက်ပွဲ ဖြစ်ပွားနေတဲ့ ပုံစံနဲ့ စစ်သင်္ဘောတွေရဲ့ ဓါတ်ပုံတွေကို အသုံးပြုထားကာ တရုတ်နိုင်ငံနဲ့ ဂျပန်နိုင်ငံတို့ရဲ့ အလံပုံတွေ လည်း ဖော်ပြထားပြီး ဓါတ်ပုံပေါ်မှာ “တောင်တရုတ်ပင်လယ်မှာ ဂျပန်နဲ့ တရုတ်တို့ရဲ့ ရေတပ်တိုက်ပွဲ စပြီ” (မူရင်း ရေးသားထားသည့်အတိုင်း) လို့ ရေးသားထားပါတယ်။
မူရင်း ရေးသား ဖြန့်ဝေမှုကို ဒီနေရာမှာ ကြည့်ပါ။
အဆိုပါ သတင်းအတုကို YouTube ပေါ်မှာ ဝင်ရောက်ကြည့်ရှုထားသူ များစွာ ရှိနေပါတယ်။
သတင်းဆန်းစစ်ချက်
တောင်တရုတ်ပင်လယ်မှာ ဂျပန်နဲ့ တရုတ်တို့ရဲ့ ရေတပ်တိုက်ပွဲ စပြီ ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူ များအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
တောင်တရုတ်ပင်လယ်မှာ ဂျပန်နဲ့ တရုတ်တို့ရဲ့ ရေတပ်တိုက်ပွဲ စတင်နေခြင်း မရှိပါဘူး။ ဒီအကြောင်းအရာဟာ သတင်းအမှား ဖြန့်သူတွေက လုပ်ကြံ ရေးသားထားခြင်းသာ ဖြစ်ပါတယ်။
ဒါ့အပြင်ဒီအကြောင်းအရာကို မည်သည့်သတင်းဌာန မည်သည့်အဖွဲ့အစည်းမှာမှ ဖော်ပြထားခြင်း မရှိသလို သတင်းအမှား ဖြန့်သူတင်ထားတဲ့ Video ထဲမှာလည်း မပါဝင်ပါဘူး။
သတင်းအမှား ဖြန့်ထားတဲ့ အဖွဲ့ကိုဝင်ရောက်စစ်ဆေးကြည့်တဲ့အခါမှာ ဝင်ရောက်ကြည့်ရှုသူများအောင် လုပ်ကြံရေးသားထားတဲ့သတင်းတွေကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့ အဖွဲ့ဖြစ်တာကိုတွေ့ရပါတယ်။