ထိုင်းမှာဖမ်းမိတဲ့ ဘတ်ငွေ ၁ သန်းကို NUG လူကုန်ကူးထာတဲ့ ပိုက်ဆံလို့ဖြန့်ထားတဲ့ သတင်းအတု

အဆိုပါ သတင်းအတုကို စစ်ကောင်စီရဲ့ ဝါဒဖြန့်တယ်လီဂရမ်ချန်နယ်တစ်ခုဖြစ်တဲ့ မှိုင်းဝေဆိုတဲ့ချန်နယ်က ဖြန့်ထားတာ ဖြစ်ပြီး သတင်းအမှားရဲ့ ခေါင်းစဉ်မှာ “NUG က လူမှောင်ခိုကူးထားသည့်ငွေဖြင့် PDF ၂ ဦးကို လက်နက်ဝယ်ခိုင်းစဉ် ထိုင်းရဲကဖမ်းဆီး” လို့ ရေးသားထားပါတယ်။ သတင်းအမှားရဲ့ အတွင်းမှာတော့ “ထိုင်း မြန်မာနယ်စပ် ကို တရားမဝင်ခိုးဝင်လာသူနှစ်ဦးကို ထိုင်းရဲတပ်ဖွဲက ဖမ်းဆီရမိခဲ့ စစ်ဆေးမှုများ အရ NUG အဖွဲမှ လူမှောင်ခိုကူးစဉ် ရရှိထားသည့် ငွေများဖြင့် ထိုင်းနိုင်ငံမဲဆောက်မြိုတွင် တိုက်ခိုက်ရေး ဒရုန်းနှင့် လက်နက်များဝယ်ယူရန် ထိုင်းဘတ် တစ်သန်း ( ကာလတန်ဖိုးကျပ်သိန်း ၁၁၀၀ ခန့်) ကိုယူဆောင်လာခဲ့ခြင်း ဖြစ်ကြောင်းသိရ။ ယင်းဘတ်တစ်သန်း ကို သိမ်းဆည်းပြီး ကွင်းဆက်တရားခံများကို ဆက်လက် ဖမ်းဆီးရန် စီစဉ်နေ” (မူရင်း ဖော်ပြထားသည့်အတိုင်း) လို့ ရေးသားထားပါတယ်။

မူရင်း ရေးသားဖြန့်ဝေမှုကို ဒီနေရာ ၊ ဒီနေရာ နဲ့ ဒီနေရာမှာ ကြည့်ပါ။

အဆိုပါ သတင်းအမှားကို တယ်လီဂရမ် ချန်နယ်တွေအပြင် ဖေ့ဘွတ်အကောင့်တုတွေနဲ့ပါ လူမှုကွန်ယက်ပေါ် ဖြန့်ဝေထားကြပါတယ်။

သတင်းဆန်းစစ်ချက်

ထိုင်းနိုင်ငံအတွင်း တရားမဝင် ဝင်ရောက်လာမှုနဲ့ ဖမ်းခံထားရတဲ့လူငယ် ၂ ဦးနဲ့အတူ သိမ်းဆည်းရမိတဲ့ ဘတ်ငွေ ၁ သန်းကို NUG က လူကုန်ကူးထားတဲ့ ပိုက်ဆံတွေလို့ဖြန့်ထားတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။

မတ်လ ၆ ရက်နေ့မှာ ထိုင်း-မြန်မာနယ်စပ် ကရင်ပြည်နယ် မြဝတီမြို့တောင်ဘက်ကနေ သောင်ရင်းမြစ်ကို ဖြတ်ပြီးထိုင်းနိုင်ငံအတွင်း ဝင်ရောက်လာတဲ့ မြန်မာနိုင်ငံသား လူငယ် ၂ ဦးကို ထိုင်းရဲတပ်ဖွဲ့က တရားမဝင် ဝင်ရောက်လာမှုနဲ့ ဖမ်းဆီးခဲ့ပြီး ၎င်းတို့နဲ့အတူ ဘတ်ငွေ ၁ သန်း သိမ်းဆီးမိတယ်လို့ ထိုင်းနိုင်ငံက သတင်းဌာန တစ်ချို့မှာ ဖော်ပြထားပါတယ်။

ဒီလိုဖမ်းဆီးရမိတဲ့ အသက် ၂၀ အရွယ် နဲ့ အသက် ၁၇ နှစ် အရွယ် လူငယ်နှစ်ဦးကို ထိုင်းရဲတပ်ဖွဲ့က အမှုဖွင့်ထားပြီး ငွေကြေးတွေနဲ့ ပတ်သက်ပြီး စစ်ဆေးနေဆဲ ဖြစ်တယ်လို့ သတင်းဌာနတွေမှာ ဖော်ပြထားပါတယ်။

ငွေ ဘတ် ၁ သန်းနဲ့အတူ လူငယ် ၂ ဦး ဖမ်းဆီးခံရတဲ့ သတင်းကို ဒီနေရာ နဲ့ ဒီနေရာမှာ ကြည့်ပါ။

မှိုင်းဝေ တယ်လီဂရမ်ချန်နယ်ဟာ အဆိုပါ သတင်းထဲက ဓါတ်ပုံတွေကိုယူပြီး NUG က လူကုန်ကူးပြီးရရှိထားတဲ့ ငွေတွေလို့ ဝါဒဖြန့်ထားတာ ဖြစ်ပါတယ်။

စစ်ကောင်စီ ထောက်ခံသူတွေဟာ NUG က လူကုန်ကူးတယ်ဆိုတဲ့ သတင်းအမှားကို မကြာခဏ ဖြန့်ဝေလေ့ရှိပြီး ယခင်ဖြန့်ဝေနေခဲ့တဲ့ သတင်းတွေကို အောက်ပါ Link တွေမှာ ဖတ်ပါ။

NUG က အမျိုးသမီးတွေကို လူကုန်ကူးနေတယ်ဆိုတဲ့ သတင်းအတု

NUG နဲ့ လက်နက်ကိုင်အဖွဲ့တွေက လူကုန်ကူးမှုတွေ ပြုလုပ်နေတယ်ဆိုတဲ့ သတင်းအတု

သတင်းအမှားဖြန့်ထားတဲ့ ဖေ့စ်ဘွတ်အကောင့်တွေကို ဝင်ရောက်စစ်ဆေးကြည့်တဲ့အခါ စစ်ကောင်စီအတွက် ဝါဒဖြန့်ချီရေးသတင်းတွေ နိုင်ငံရေးအမြတ်ထုတ်ဖို့ လုပ်ကြံရေးသားထားတဲ့ သတင်းအမှားတွေ ၊ တော်လှန်ရေးအင်အားစုတွေကို တိုက်ခိုက်တဲ့ သတင်းအမှားတွေ မကြာခဏ ဖြန့်ဝေနေတာကို တွေ့ရပါတယ်။