အမီးရ်ခန်းက ဂျုံအိတ်တွေထဲမှာ ငွေတွေထည့်ပြီး လှူခဲ့တယ်ဆိုတဲ့ သတင်းအမှား

ဒီအကြောင်းအရာကို ဇူလိုင် ၂၂ ရက်နေ့က စတင်ပြီး လူမှုကွန်ရက်တွေပေါ်မှာ ဖြန့်ဝေနေတာဖြစ်ပြီး ထပ်ဆင့်ဖြန့်ဝေသူ အများအပြားလည်း ရှိနေပါတယ်။

ဖြန့်ဝေရာမှာ အမီးရ်ခန်းဟာ Covid ကာလအတွင်းတုန်းက သူထုပ်ထားတဲ့ ဂျုံကြမ်းထုပ်လေးတွေ လာယူဖို့ လူတွေကို ကြေငြာကြောင်း၊ လူတွေက သူ့လိုလူချမ်းသာတစ်ယောက်က ဂျုံကြမ်းပဲပေးလို့ ဝေဖန်ခဲ့ကြောင်း၊ သူ့အနေနဲ့ ဂျုံအနု ဒါမှမဟုတ် ပိုက်ဆံပေးသင့်ကြောင်း၊ လူအများစုက သွားမယူကြပေမယ့် တစ်ကယ်စားရမဲ့ သောက်ရမဲ့ အတိဒုက္ခရောက်နေတဲ့သူတွေကတော့

သွားယူခဲ့ရာမှာ ဂျုံအိတ်တွေထဲမှာ အိန္ဒိယငွေ ရူပီး တစ်သောင်းခန့် တွေ့ရကြောင်း၊ ဒီအကြောင်းကို မင်းသားက တကယ်ကို လိုအပ်သူတွေရစေချင်လို့ လုပ်ခဲ့တာပါလို့ နောက်ပိုင်းမှာ ပြန်လည်ပြောဆိုကြောင်းတွေ ရေးသားထားတာပါ။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။

သတင်းဆန်းစစ်ချက်

တကယ်တော့ ဒီအကြောင်းအရာကို ခုမှစတင်ဖြန့်ဝေခဲ့တာ မဟုတ်ပါဘူး။ ပြီးခဲ့တဲ့ ၂၀၂၀ ခုနှစ် မေလ အတွင်းမှာကတည်းက ဖြန့်ဝေခဲ့တာပါ။ ဒီဖြန့်ဝေမှုတွေဟာ သတင်းအမှားဖြစ်တယ်ဆိုတာကို BOOM က သတင်းဆန်းစစ်ပြီး ဖြစ်ပါတယ်။

BOOM ရဲ့ သတင်းဆန်းစစ်ချက်ထဲမှာ အမီးရ်ခန်းက ဂျုံအိတ်တွေထဲ ပိုက်ဆံထည့်ပြီး လှူတာ သူမဟုတ်ဘူးလို့ သူ့ရဲ့ တွစ်တာ စာမျက်နှာပေါ်မှာ ရေးသားခဲ့ကြောင်းနဲ့ ဒါဟာ ကောလဟာလ တွေသာ ဖြစ်တယ်လို့ ပြောဆိုခဲ့ကြောင်း ရေးသားဖော်ပြခဲ့ပါတယ်။ BOOM ရဲ့ သတင်းဆန်းစစ်ချက်မှု အပြည့်အစုံကို ဒီနေရာ မှာ ကြည့်ရှု့နိုင်ပါတယ်။