ဒီအကြောင်းအရာကို Mandalay Khithit ဆိုတဲ့ Youtube ချန်နယ်တစ်ခုမှာ နိုဝင်ဘာလ ၂၈ ရက်နေ့မှာ စတင်ဖြန့်ဝေခဲ့တာ ဖြစ်ပြီး ဝင်ရောက်ကြည့်ရှု့သူ အများအပြား ရှိနေပါတယ်။
ဖြန့်ဝေရာမှာ ကြာချိန် ၁၂ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'ဆရာတော် ဘုန်းကြီးတွေ လမ်းပေါ် ပြည့်နေပြီ။ ရန်ကုန် မန္တလေး အများအပြား လမ်းမပေါ် ရောက်ပြီ။ စစ်တပ်ကို နိုင်ငံရေးက ထွက်ရန် ပြည်သူကို သတ်ဖြတ်တာ ရပ်ရန် ဆန္ဒပြနေကြပြီ။ ဆရာတော်ကြီး တွေ စစ်တပ်က ဖမ်းဆီး' လို့ ရေးသားထားပါတယ်။
ဖြန့်ဝေမှုကို ဒီနေရာ မှာ ဝင်ရောက်ကြည့်ရှုနိုင်ပါတယ်။
သတင်းဆန်းစစ်ချက်
ရန်ကုန်နဲ့ မန္တလေးမြို့တွေမှာ ဘုန်းကြီးရဟန်း အများအပြား ဆန္ဒပြတယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။
ဖြန့်ဝေထားတဲ့ ဗီဒီယိုထဲမှာ သံလွင်တိုင်းမ် သတင်းဌာနမှာ နိုဝင်ဘာ ၂၈ ရက်နေ့က ဖော်ပြထားတဲ့ 'သာသနာနွယ်ဖောင်ဒေးရှင်း ဆရာတော်နှင့် ကပ္ပိယ နှစ်ဦးကို မုပွန်နယ်မြေရဲစခန်းတွင် ဖမ်းဆီးစစ်ဆေးနေ' ဆိုတဲ့ သတင်းကို နောက်ခံစကားပြောနဲ့ ပြန်လည်ပြောဆို ထားတာသာ ဖြစ်ပါတယ်။
သတင်းထဲမှာ စစ်တပ်က ဖမ်းဆီးသွားတဲ့ သာသနာနွယ်ဖောင်းဒေးရှင်း ဆရာတော် အရှင်စန္ဒာဇောတိနဲ့ ကပ္ပိယနှစ်ဦးကို မုပွန်နယ်မြေရဲစခန်းမှာ စစ်ဆေးမှုတွေ ပြုလုပ်နေကြောင်း၊ တောင်ဝိုင်းတောင်ကို စစ်ကော်မရှင်က ဖြိုချနေတဲ့ ကိစ္စနဲ့ ပတ်သတ်ပြီး သဘာဝပတ်ဝန်းကျင် ထိခိုက်နိုင်တယ်လို့ ဆရာတော်က အွန်လိုင်းပေါ်မှာ ထောက်ပြပြောဆိုခဲ့တဲ့အတွက် စစ်တပ်က ဖမ်းဆီးခဲ့တာဖြစ်ကြောင်း၊ မွန်ပွန်ရဲစခန်းမှာ စစ်ဆေးခံနေရစဉ် ဆရာတော်နဲ့ နီးစပ်သူ မည်သူတစ်ဦးတစ်ယောက်နဲ့မှ တွေ့ဆုံခွင့်မပြုတဲ့အတွက် အဆက်သွယ်ပြတ်တောက်နေကြောင်း ရေးသားထားတာပါ။
ဒီသတင်းထဲမှာ ရန်ကုန်နဲ့ မန္တလေးမြို့တွေမှာ ဘုန်းကြီးရဟန်း အများအပြား ဆန္ဒပြတယ်ဆိုတဲ့ အကြောင်းအရာ မပါဝင်သလို အခြားယုံကြည်စိတ်ချရတဲ့ သတင်းဌာနတွေမှာ ဖော်ပြထားတာလည်း မရှိပါဘူး။
သံလွင်တိုင်းမ် သတင်းဌာနမှာ ဖော်ပြထားတဲ့ သတင်းကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။