ဒီသတင်းကို သတင်းအမှားတွေ ဆက်တိုက်ဖြန့်ဝေနေတဲ့ ဖေစ့်ဘွတ်ပေချ့်တွေမှာ ဇန်နဝါရီ ၁၆ ရက်နေ့ နေ့လည်ပိုင်းက စတင်ဖြန့်ဝေနေကြတာပါ။ ဖြန့်ဝေရာမှာ ကြာချိန် ၁၁ မိနစ်ကျော်ရှိတဲ့ ဗွီဒီယိုဖိုင်တစ်ခုနဲ့အတူ ‘လေကြောင်း ကျူးကျော်မှု အပြင်းအထန် အရေးယူပြီ။ အိန္ဒိယ ကြမ်းပြီ။ လေကြောင်း ကျူးကျော်မှု အပြင်းအထန် အရေးယူ’ ဆိုပြီး ရေးသားဖြန့်ဝေနေတာပါ။
ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။
ချင်းအမျိုးသားတပ်ဦး CNF ဌာနချုပ်ကို စစ်ကောင်စီက ပြီးခဲ့တဲ့ ဇန်နဝါရီလ ၁၀ ရက်နေ့က ဂျက်တိုက်လေယာဉ် ငါးစီးနဲ့ ဗုံးကြဲတိုက်ခိုက်ခဲ့ပြီး ဗုံးငါးလုံး ကြဲချခဲ့ရာမှာ လေးလုံးက CNF စခန်းထဲကို ကျရောက်ခဲ့ပြီး ကျန်တစ်လုံးမှာ အိန္ဒိယဘက်ကို ကျတယ်လို့ CNF ဘက်က ပြောကြားထားတာရှိပါတယ်။
တိုက်ခိုက်မှုအတွင်း CNF ရဲဘော် သုံးဦးနဲ့ ရဲမေ နှစ်ဦး စုစုပေါင်းငါးဦး သေဆုံးခဲ့ပြီး အနည်းဆုံး ၁ဝ ဦးထက်မနည်း ထိခိုက်ဒဏ်ရာရခဲ့တယ်လို့ သတင်းဌာနတွေမှာ ဖော်ပြထားပါတယ်။
သတင်းဆန်းစစ်ချက်
ဖြန့်ဝေထားတဲ့ ဗွီဒီယိုဖိုင်ထဲကို စစ်ဆေးကြည့်ရှု့ရာ လေကြောင်း ကျူးကျော်မှု အတွက် အိန္ဒယက အရေးယူတယ်ဆိုတဲ့ အကြောင်းအရာ ပါဝင်ခြင်းမရှိပဲ သတင်းဌာနတွေမှာ ဖော်ပြထားတဲ့ CNF ဌာနချုပ် ဗုံးကြဲတိုက်ခိုက်ခံရတယ်ဆိုတဲ့ အကြောင်းအရာကို နောက်ခံစကားပြောနဲ့ ပြန်လည်ပြောဆိုထားတာပဲ ဖြစ်ပါတယ်။
စစ်ကောင်စီရဲ့ ဒီလုပ်ရပ်အပေါ် အိန္ဒိယဘက်က အရေးယူပေးဖို့ ဒေါက်တာဆာဆာအပါအဝင် အဖွဲ့အစည်းတွေအနေနဲ့ ဆန္ဒရှိနေကြပြီး မီဇိုရမ်ပြည်နယ်က အင်အားကြီးအရပ်ဖက်အဖွဲ့အစည်း ၅ ဖွဲ့က အိန္ဒိယပြည်ထဲရေးဝန်ကြီးထံ စာရေးသားပေးပို့မယ်လို့ ဆိုပါတယ်။
ဒါပေမယ့် အိန္ဒိယ- မြန်မာ နယ်စပ်တလျောက်လုံခြုံရေးယူထားသည့် အိန္ဒိယလုံခြုံရေးတပ်ဖွဲ့ တစ်ဖွဲ့ဖြစ်တဲ့ အိန္ဒိယအာသံရိုင်ဖယ်တပ်က CNF ဌာနချုပ် ဗုံးကြဲတိုက်ခိုက်ခံရမှု ဖြစ်စဉ်မှာ အိန္ဒိယနိုင်ငံဘက်ခြမ်းကို ဗုံးကျရောက် ပေါက်ကွဲမှု မရှိခဲ့ဘူးလို့ ထုတ်ဖော်ပြောဆိုခဲ့တယ်လို့ Rediff သတင်းကို ကိုးကားပြီး ဧရာဝတီသတင်းဌာနမှာ ဇန်နဝါရီ ၁၃ ရက်နေ့က ဖော်ပြထားပါတယ်။
The Irrawaddy သတင်းဌာမှာ ဖော်ပြထားတဲ့ သတင်းကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
ဒါကြောင့် လေကြောင်းကျူးကျော်မှုအတွက် အိန္ဒိယ ပြင်းပြင်းထန်ထန်အရေးယူတယ်ဆိုပြီး ဖြန့်ဝေနေတာတွေဟာ သတင်းအမှားပဲ ဖြစ်ပါတယ်။