ဒီအကြောင်းအရာကို Khit Thit Media သတင်းဌာနရဲ့ နာမည်ကို ယူသုံးပြီး ချန်နယ်ထောင်ထားတဲ့ Khit Thit Media ဆိုတဲ့ Youtube ချန်နယ်တစ်ခုမှာ ဩဂုတ် ၂၆ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။
ဖြန့်ဝေရာမှာ ကြာချိန် ၁၀ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'ICC ခုံရုံးအမိန့်ချပြီ။ လူမျိုးတုန်းသတ်ဖြတ်မှုအတွက် စစ်ဗိုလ်ချုပ်တွေကို သေဒဏ်ပေးဖို့ ဗြိတိန်ကြေညာ။ နေပြည်တော် တုန်လှုပ်နေပြီ' လို့ ရေးသားထား တာပါ။
ဖြန့်ဝေမှုကို ဒီနေရာ မှာ ဝင်ရောက် ကြည့်ရှု့နိုင်ပါတယ်။
သတင်းဆန်းစစ်ချက်
စစ်ဗိုလ်ချုပ်တွေကို သေဒဏ်ပေးဖို့ ဗြိတိန်ကြေညာတယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။
ဖြန့်ဝေထားတဲ့ အကြောင်းအရာဟာ Khit Thit Media သတင်းဌာနမှာ ဩဂုတ် ၂၆ ရက်နေ့က ဖြန့်ဝေထားတဲ့ 'စစ်တပ်၏ ရိုဟင်ဂျာလူမျိုးတုန်းသတ်ဖြတ်မှု ၈ နှစ်ပြည့်ချိန် မင်းအောင်လှိုင်နှင့် စစ်ခေါင်းဆောင်များကို နိုင်ငံတကာတရားရုံးရှေ့ မှောက် ခေါ်ဆောင်ရန် SAC-M တိုက်တွန်း၊ ဗြိတိန်က တရားမျှတမှု ရရှိရေး ဆက်ပံ့ပိုးမည်' ဆိုတဲ့ သတင်းကို နောက်ခံ စကားပြောနဲ့ ပြန်လည် ပြောဆိုထားတဲ့ ရုပ်သံဖိုင်ပဲ ဖြစ်ပါတယ်။
ဒီသတင်းထဲမှာ လွန်ခဲ့တဲ့ ၈ နှစ် ၂၀၁၇ ခုနှစ်၊ ဩဂုတ်လ ၂၅ ရက်နေ့က ရခိုင်ပြည်နယ်မြောက်ပိုင်းက ရိုဟင်ဂျာပြည်သူ များအပေါ် မြန်မာစစ်တပ်က ရက်ရက်စက်စက် လူမျိုးသုန်းသတ်ဖြတ်ပြီး အကြမ်းဖက်မှု ကျူးလွန်ခဲ့ကြောင်း၊ စစ်တပ်က မီးရှို့ခြင်း၊ မုဒိန်းကျင့်ခြင်း၊ ညှင်း ပန်းနှိပ်စက်ခြင်း၊ လူမျိုးစုသုတ်သင်ရှင်လင်းခြင်း လုပ်ရပ်များကို အဖွဲ့အစည်းလိုက် စနစ်တကျကျူးလွန်ခဲ့တဲ့အတွက် ထိုဖြစ်စဉ်တွေအတွင်း ရိုဟင်ဂျာပြည်သူ ထောင်ပေါင်းများစွာ သတ်ဖြတ်ခံခဲ့ရကြောင်း၊ လူ ၇၅၀,၀၀၀ ခန့် နယ်စပ်ဖြတ်ကျော်ပြီး ဘင်္ဂလားဒေ့ရှ် နိုင်ငံထဲကို ထွက်ပြေးကာ ယခင် လူမျိုးရေးဖိနှိပ်သတ်ဖြတ်မှုတွေကြောင့် နေရပ်စွန့်ခွာထွက်ပြေးခဲ့ရသူတွေနဲ့ အတူ သွားရောက်ပေါင်းစည်း နေထိုင်ခဲ့ရကြောင်း တွေ ရေးသားထားတာပါ။
ဒီသတင်းထဲမှာ စစ်ဗိုလ်ချုပ်တွေကို သေဒဏ်ပေးဖို့ ဗြိတိန်ကြေညာတယ်ဆိုတဲ့ အကြောင်းအရာ မပါဝင်သလို တခြားယုံကြည်စိတ်ချရတဲ့ သတင်းဌာနတွေမှာလည်း ဖော်ပြထားတာ မရှိပါဘူး။
Khit Thit Media သတင်းဌာနမှာ ဖော်ပြထားမှုကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။