ဒီဖြန့်ဝေမှုကို Myanmar Celebrity Club ဆိုတဲ့ ဖေစ့်ဘွတ်ပေချ့်က မတ်လ ၁၀ ရက်နေ့ ညပိုင်းမှာ စတင်ဖြန့်ဝေခဲ့တာဖြစ်ပြီး "EPC တွင် မီးလာချိန်၄ နာရီကို ၃နာရီထပ်တိုး ၁၅သိန်းဖြင့် လမ်းတစ်လမ်းအတွက် စုပေါင်းဝယ်လို့ရနေပြီလို့သိရပါသည်" လို့ ရေးသားဖြန့်ဝေနေတာပါ။
၁၂ နာရီအတွင်း လူပေါင်း ငါးထောင်နီးပါး ထပ်ဆင့်ဖြန့်ဝေနေပြီး ကူးယူဖြန့်ဝေမှုတွေလည်း ရှိနေပါတယ်။
ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
သတင်းဆန်းစစ်ချက်
ဒီသတင်းနဲ့ ပါတ်သတ်ပြီး BOOM က စမ်းချောင်းမြို့နယ် လျှပ်စစ်ဓာတ်ဖြန့်ဖြူးရေးဌာနကို ဖုန်းနဲ့ဆက်သွယ်မေးမြန်းကြည့်ရာ "ဒါသတင်းက လုံးဝမဟုတ်ပါဘူး။ မီးပိတ်တာ ဖွင့်တာတွေကို ရုံးချုပ်ကတိုက်ရိုက်လုပ်တာ။ ရုံးချုပ်ရဲ့ စီမံကွပ်ကဲမှုအောက်မှာပဲ လုပ်ရတာ။ ကျွန်တော်တို့ စမ်းချောင်း epc မှာရှိတဲ့ ဝန်ထမ်း ၂၆ ယောက်မှာ ၁၅ ယောက်က စမ်းချောင်းသားတွေချည့်ပဲ။ ကျွန်တော်တို့အိမ်တွေလည်း ပျက်တာပဲ။ လုပ်လို့ရရင် ကျွန်တော်တို့အရင်လုပ်ပြီးသွားပြီ။ အခုဖြန့်နေတာတွေက မဟုတ်ပါဘူး။" လို့ ပြန်လည်ဖြေကြားထားပါတယ်။