ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ HD videos ဆိုတဲ့ ဖေစ့်ဘွတ်ပေချ့်မှာ မေလ ၅ ရက်နေ့ နေ့လည်ပိုင်းမှာ စတင်ဖြန့်ဝေနေတာဖြစ်ပြီး ထပ်ဆင့်ဖြန့်ဝေမှုတွေလည်း ရှိနေပါတယ်။
ဖြန့်ဝေရာမှာ ကြာချိန် ၁၁ မိန်စ်နီးပါးရှိတဲ့ ဗွီဒီယိုဖိုင်တစ်ခုနဲ့အတူ ‘တိုင်းပြည်၏ ၉၈% NUG ထိန်းချုပ်လိုက်ပြီ။ စင်ပေါ်က ခွေး ပစ်ချပြီ။ တနိုင်ငံလုံး မြို့နယ်၏ ၈၀% NUG သိန်းပြီ။ ၂ ရာခိုင်နှုန်းသာ မအလထိန်းချုပ်။ ပွဲသိမ်းပြီ’ ဆိုတဲ့ စာသားတွေကို ဗီဒီယိုခေါင်းစဉ်တွေအဖြစ်တဲ့ ရေးသားဖြန့်ဝေထားတာဖြစ်ပါတယ်။
ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။
သတင်းဆန်းစစ်ချက်
ဖြန့်ဝေနေတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက် ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
အခုဖြန့်ဝေထားတဲ့ ဗွီဒီယိုထဲမှာ ဧရာဝတီတိုင်းမ်သတင်းဌာနမှာ မေလ ၅ ရက်နေ့က ဖော်ပြထားတဲ့ ‘တိုင်းပြည်ကို ထိထိရောက်ရောက် ထိန်းချုပ်နိုင်စွမ်း မရှိတော့တဲ့ မြန်မာစစ်တပ်’ ဆိုတဲ့ သတင်းကို နောက်ခံစကားပြောနဲ့ ပြန်လည်ပြောဆိုထားတာပါ။
မူရင်းသတင်းကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
ဒီဗွီဒီယိုဖိုင်ထဲမှာ ‘တိုင်းပြည်၏ ၉၈% NUG ထိန်းချုပ်လိုက်ပြီ’ ဆိုတဲ့ အကြောင်းအရာ မပါဝင်သလို ယုံကြည်စိတ်ချရတဲ့ သတင်းဌာန အဖွဲ့အစည်းတွေမှာလည်း ဖော်ပြထားတာ မရှိပါဘူး။ သတင်းအမှားဖြန့်ထားတဲ့ ဖေစ့်ဘွတ်ပေချ့်တွေကို စစ်ဆေးကြည့်တဲ့အခါ သတင်းခေါင်းစဉ် ဓါတ်ပုံတွေမှာ လိမ်ညာရေးသားပြီး ကြည့်ရှုများအောင်ပြုလုပ်ထားတဲ့ Click baits သတင်းတွေ ဖြန့်နေတဲ့ အဖွဲ့တွေဖြစ်တာကို တွေ့ရပါတယ်။