အဆိုပါ သတင်းအတုကို Shristi Bhavalakar ဆိုတဲ့ ဖေ့စ်ဘွတ်ပေ့ချ်က တင်ထားတာဖြစ်ပြီး သတင်းအမှားကို ဖြန့်ဝေရာမှာ ၈ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားပါတယ်။ ၎င်း Video ရဲ့ နောက်ခံ ဓါတ်ပုံမှာ အမေရိကန် သမ္မတ ဂျိုးဘိုက်ဒန်ရဲ့ ဓါတ်ပုံကို အသုံးပြုထားပြီး ဓါတ်ပုံအပေါ်မှာ " ၁၆ ရက်နေ့ မြန်မာအရေး သမ္မတကြီး ခေါင်းခဲပြီ။ US စစ်သား ၅ သိန်း မြန်မာကို ပို့ဖို့ ဆုံးဖြတ်" လို့ ရေးသားထားပါတယ်။
ဒီ Video ကို လူမှုကွန်ယက်ပေါ် ဖြန့်ဝေရာမှာ "မြန်မာအရေး US သမ္မတကြီး ခေါင်းခဲပီ" (သတ်ပုံ မူရင်းအတိုင်း) လို့ ရေးသားထားပါတယ်။
မူရင်း ရေးသားဖြန့်ဝေမှုကို ဒီနေရာ ၊ ဒီနေရာ နဲ့ ဒီနေရာမှာာ ကြည့်ပါ။
အဆိုပါ သတင်းအမှားကို Like လုပ်ထားသူ ၂၁၀၀၀ ကျော်နဲ့ ထပ်ဆင့်ဝေမျှထားသူ ၉၀၀ ကျော်ရှိကာ ဝင်ရောက်ကြည့်ရှု့ထားသူ ၃ သိန်းခွဲကျော် ရှိနေပါတယ်။
သတင်းဆန်းစစ်ချက်
US စစ်သား ၅ သိန်း မြန်မာနိုင်ငံကို ပို့ပေးဖို့ အမေရိကန်သမ္မတ ဂျိုးဘိုက်ဒန်က ဆုံးဖြတ်လိုက်တယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် လိမ်ညာရေးသားထားတဲ့ သတင်းအတုဖြစ်တာကို တွေ့ရပါတယ်။
မြန်မာနိုင်ငံအရေးနဲ့ ပတ်သက်ပြီး အမေရိကန်က စစ်သားတစ်ဦးတစ်ယောက်မှ ပို့ဆောင်ပေးခြင်း မရှိသလို စစ်သား ၅ သိန်းပို့မယ်လို့လည်း ပြောကြားထားခြင်း မရှိပါဘူး။ ဒီသတင်းအတုဟာ ဝင်ရောက်ကြည့်ရှု့သူများအောင် သတင်းခေါင်းစဉ်မှာ လိမ်ညာရေးသားထားတဲ့ Clickbaits သတင်းတစ်ပုဒ်သာ ဖြစ်ပါတယ်။
ဒါ့အပြင် အမေရိကန် သမ္မတက စစ်သာ ၅ သိန်း မြန်မာပြည်ကို ပို့ပေးမယ်လို့ Video ပေါ်မှာ ရေးသားထားပေမယ့် ၎င်း Video အတွင်းမှာတော့ ဒီအကြောင်းအရာ မပါဝင်ပါဘူး။ Video အတွင်းမှာတော့ ကမ္ဘောဒီးယားနိုင်ငံ ဖနွမ်းပင်မြို့မှာ ကျင်းပခဲ့တဲ့ အာဆီယံထိပ်သီး အစည်းအဝေးအကြောင်း ပြောထားတဲ့ သတင်းတစ်ပုဒ်က နောက်ခံအသံကို အသုံးပြုထားတာ ဖြစ်ပါတယ်။
အဆိုပါ သတင်းထဲမှာ အမေရိကန်က စစ်သား ၅ သိန်းပို့မယ်ဆိုတဲ့ အကြောင်းအရာ တစ်ခုမှ မပါဝင်ပါဘူး။
သတင်းအမှားဖြန့်ထားတဲ့ ဖေ့စ်ဘွတ်အကောင့်ကို စစ်ဆေးကြည့်တဲ့အခါမှာ ဝင်ရောက်ကြည့်ရှု့သူများအောင် သတင်းခေါင်းစဉ်တွေကို လိမ်ညာရေးသားထားတဲ့ Clickbaits သတင်းတွေ ဖြန့်ကာ ဝင်ငွေရှာနေတဲ့ အဖွဲ့ဖြစ်တာကို တွေ့ရပါတယ်။