အဆိုပါ သတင်းအတုကို Bro Than ဆိုတဲ့ ဖေ့စ်ဘွတ်ပေ့ချ်က မတ်လ ၆ ရက်နေ့မှာ ဖြန့်ဝေထားတာဖြစ်ပြီး သတင်းအမှားကို ဖြန့်ဝေရာမှာ ၇ မိနစ်ကျော်ကြာမြင့်တဲ့ Video တစ်ပုဒ်နဲ့ တွဲတင်ထားပါတယ်။ Video ရဲ့နောက်ခံ “ဓါတ်ပုံပေါ်မှာ ရုရှားထွက်ခွဲပြီ။ မြန်မာနဲ့ သဘောတူထားတဲ့ စာချုပ် ရုရှားဖက်မှ အကန့်အသတ်မဲ့ ရွေ့ဆိုင်းလိုက်ပြီ” လို့ ရေးသားထားကာ လူမှုကွန်ယက်ပေါ်ဖြန့်ဝေရာမှာတော့ “စာချုပ်အားလုံးဖျက်သိမ်းပြီး သံရုံးပါ ပိတ်သိမ်းလိုက်ပြီ” လို့ ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာ နဲ့ ဒီနေရာမှ ကြည့်ပါ။အဆိုပါ video ကို Facebook page ၃ ခုနဲ့ YouTube channel တစ်ခုကနေ ဖြန့်ဝေထားပြီး ဝင်ရောက်ကြည့်ရှု့သူ များစွာ ရှိနေပါတယ်။
သတင်းဆန်းစစ်ချက်
စစ်ကောင်စီနဲ့ ချုပ်ဆိုထားတဲ့ စာချုပ်အားလုံးရုရှားက ဖျက်သိမ်းပြီး သံရုံးပါ ပိတ်သိမ်းသွားပြီဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် လုပ်ကြံရေးသားထားတဲ့သတင်းအတုဖြစ်တာကို တွေ့ရပါတယ်။
ရုရှားဟာ စစ်ကောင်စီကို ဆက်လက်ထောက်ပံ့နေဆဲဖြစ်ပြီး မည်သည့်စာချုပ်မှ ဖျက်သိမ်းချင်းမရှိသလို သံရုံးလည်း ပိတ်သိမ်းသွားချင်း မရှိပါဘူး။ သတင်းအမှားဖြန့်သူတွေကသာ လုပ်ကြံရေးသားထားခြင်းဖြစ်ပါတယ်။
ဒါ့အပြင် Video ရဲ့ ခေါင်းစဉ်မှာ ရုရှားက စာချုပ်တွေ ဖျက်သိမ်းပြီး သံရုံးပိတ်သိမ်းသွားပြီလို့ ဆိုထားပေမယ့် Video အတွင်းမှာတော့ ဒီအကြောင်းအရာ မပါဝင်ပါဘူး။ Video အတွင်းမှာ ကိုမင်းကိုနိုင် ရေးသားထားတဲ့ အကြောင်းအရာ တစ်ခုကို နောက်ခံအသံရွတ်ဆိုပြီး သတင်းပုံစံ ဖန်တီးထားတာဖြစ်ပါတယ်။
သတင်းအမှားဖြန့်ထားတဲ့ ဖေ့စ်ဘွတ်ပေ့ချ်ကို ဝင်ရောက်စစ်ဆေးကြည့်တဲ့အခါ ကြည့်ရှု့သူများအောင် သတင်းခေါင်းစဉ်တွေမှာ လိမ်ညာရေးသားပြီး ကြည့်ရှု့သူအရေအတွက်ကနေ ဝင်ငွေပြန်ရှာနေတဲ့ click baits သတင်းတွေ ဖြန့်နေတဲ့ အဖွဲ့ဖြစ်တာကို တွေ့ရပါတယ်။