အဆိုပါ သတင်းအတုကို ဩဂုတ်လ ၂၁ ရက်နေ့မှာ YouTube ချန်နယ်တစ်ခုက စတင်ဖြန့်ဝေထားတာဖြစ်ပြီး သတင်းအမှားကို ဖြန့်ဝေရာမှာ ၈ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာ ဖြစ်ပါတယ်။ အဆိုပါ Video ရဲ့ နောက်ခံမှာ စစ်ကောင်စီပြန်ကြားရေးက ဇော်မင်းထွန်းရဲ့ ဓါတ်ပုံရယ်၊ လက်နက်ကိုင်ဆောင်ထားသူတွေပါဝင်တဲ့ဓါတ်ပုံရယ် သတင်းကြေညာထားသူတစ်ဦးရဲ့ ဓါတ်ပုံကို ဖော်ပြထားပြီး ဓါတ်ပုံပေါ်မှာ “၂၁ ရက်နေ့ အရေးပေါ် ရန်ကုန် PDF (၂) ထောင်ကျော် ဝင်ရောက်လာ၊ ဗိုလ်ချုပ်ကြီးအဆင့်တွေ ပစ်သတ်ခံနေရ” လို့ ဖော်ပြထားပါတယ်။ အဆိုပါ Video ကို ဖြန့်ဝေရာမှာလည်း “ရန်ကုန် PDF တွေ အစုလိုက်အပြုံလိုက်ဝင်ရောက်လာ” လို့ ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာမှာ ကြည့်ပါ။
အဆိုပါ Video ကို ၁ ရက်အတွင်း ဝင်ရောက်ကြည့်ရှုထားသူ ၇၀၀၀ ကျော်ရှိနေပါတယ်။
သတင်းဆန်းစစ်ချက်
ရန်ကုန်မြို့ကို PDF (၂) ထောင်ကျော် ဝင်ရောက်လာပြီး ဗိုလ်ချုပ်ကြီးအဆင့်တွေ ပစ်သတ်ခံနေရတယ် ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
ရန်ကုန်မြို့မှာ လှုပ်ရှားနေတဲ့ PDF တွေ များစွာရှိပေမယ့် လူပေါင်း ၂ ထောင်ကျော် ဝင်ရောက်လာခြင်းမရှိသလို ရန်ကုန်မှာ ဒီရက်ပိုင်းထဲ စစ်ဗိုလ်ချုပ်တွေအပါအဝင် မည်သည့်စစ်သား မှ ပစ်သတ်ခံရတဲ့ဖြစ်စဉ်မရှိသေးပါဘူး။ သတင်းအမှားဖြန့်သူတွေက လုပ်ကြံရေးသားထားခြင်းသာဖြစ်ပါတယ်။
ဒါ့အပြင် သတင်းအမှား Video ထဲမှာလည်း ဒီအကြောင်းအရာ မပါဝင်ပါဘူး။ သတင်းအမှား Video ထဲမှာ တစ်ခြား သတင်းအကြောင်းအရာတွေ တစ်ခြား စစ်ရေးသတင်းတွေကိုသာ ဖော်ပြထားပါတယ်။
သတင်းအမှားဖြန့်ထားတဲ့ အဖွဲ့ကို ဝင်ရောက်စစ်ဆေးကြည့်တဲ့အခါ ဝင်ရောက်ကြည့်ရှု သူများအောင် သတင်းခေါင်းစဉ် ဓါတ်ပုံတွေမှာ လိမ်ညာရေးသားပြီး ကြည့်ရှုများအောင်ပြုလုပ်ထားတဲ့ Click baits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။