သေနတ်သမားကြည်လင်း လွတ်တဲ့သတင်း မမှန်
"သေချာပေါက်ပြောနိုင်တာကတော့လွတ်ငြိမ်းကြောင့်တော့ကြည်လင်းက လွတ်မလာနိုင်ဘူး"
လူမှုကွန်ရက်မှာပျံ့နှံ့နေတဲ့ ဦကိုနီလုပ်ကြံခံရမှုတရားခံကြည်လင်းပြန်လွတ်လာပြီဆိုတဲ့ သတင်းတွေဟာ တရားဝင်သတင်းဌာနတွေကအတည်ပြုထားခြင်းမရှိသလို ဥပဒေပညာရှင်အချို့ကလည်းဒီသတင်းအပေါ်ငြင်းဆိုထားပါတယ်။
လူမှုကွန်ရက်မှာပျံ့နှံံ့နေတဲ့ပုံဟာ ကြည်လင်းကိုရုံးထုတ်စဉ်က RFA သတင်းဌာနက ရိုက်ကူးခဲ့တဲ့ပုံတစ်ပုံကိုအသုံးပြုပြီးပြန်လည်ဖြန့်ဝေနေကြတာသာဖြစ်ပြီး ကြည်လင်းလွတ်မြောက်လာတယ်ဆိုတဲ့ ဓါတ်ပုံနဲ့သတင်းတွေဟာ တရားဝင်သတင်းဌာနတွေကဖေါ်ပြရေးသားထားတာလည်းမရှိသေးပါဘူး။
လက်ရှိပျံံ့နေတဲ့ ကောလဟာလတွေနဲ့ပတ်သက်လို့ ဥပဒေပညာရှင်ဖြစ်သူ ဦးခင်မောင်မြင့်နဲ့ Boom ကဆက်သွယ်မေးမြန်းရာမှာ အခုလိုဖြေကြားထားပါတယ်။
"ကြည်လင်းနဲ့ပတ်သက်ပြီး ကျွန်တော်တို့နောက်ဆုံးသိလိုက်တာတော့ သူက အယူခံမှာ သေဒဏ်ကနေ တသက်တကျွန်းပြောင်းထားတယ်ပေ့ါ။ ဒီနေ့လွတ်ငြိမ်းမှာ ကျွန်တော်တို့တွေ့ထားတာက ဒေါက်တာအေးမောင်တို့ သူနဲ့အတူတူကျတဲ့ ဒေါက်တာဝေဟင်အောင်တို့ ဒါတော့ကျွန်တော်တို့တွေ့တယ်။ သေချာပေါက်ပြောနိုင်တာကတော့လွတ်ငြိမ်းကြောင့်တော့ကြည်လင်းက လွတ်မလာနိုင်ဘူး။လွတ်ငြိမ်းအရဆိုရင်တစ်သက်တကျွန်းကနေဆယ်နှစ်ပြောင်းတယ်။ ဆယ်နှစ်ပြောင်းမယ်ဆ်ိုရင်တောင်အနည်းဆုံးထောင်ထဲမှာခြောက်နှစ်ရှစ်လနေကိုနေရမယ်။ အကျဉ်းထောင်လက်စွဲဥပဒေအရ။ခုလက်ရှိရှိနေတာကလေးနှစ်ပဲရှိတဲ့အတွက်နောက်ထပ် နှစ်နှစ်ခြောက်လလောက်ကျခံဖို့ကျန်မယ်" လို့ဖြေကြားခဲ့ပါတယ်။
ဦးကိုနီကို သေနတ်နဲ့ပစ်သတ်ခဲ့တဲ့တရားခံကြည်လင်းကို ၂၀၁၉ ဖေဖေါ်ဝါရီလအတွင်းက မြောက်ပိုင်းခရိုင်တရားရုံးက ပုဒ်မ - ၃၀၂ (၁)(ခ)၊ ၃၄/၃၀၂ (၂) အရ ကြိုးမိန့်နဲ့သေဒဏ်ချမှတ်ခဲ့တဲ့အပြင်၊ လေဆိပ်က တက္ကစီယာဉ်မောင်း ကိုနေဝင်းကို သတ်မှုနဲ့ ထောင်ဒဏ် နှစ် ၂၀ပူးတွဲချမှတ်ခဲ့ပါတယ်။ဒါ့အပြင် လက်နက်ကိုင်ဆောင်မှု ၁၉(ဃ)(စ) အရ ထောင်ဒဏ် ၃ နှစ် ချမှတ်ထားခဲ့တာဖြစ်ပါတယ်။
အာဏာသိမ်းအစိုးရက လက်ရှိအကျဉ်းထောင်အသီးသီးမှာပစ်ဒဏ်ကျခံနေရတဲ့အကျဉ်းသားသောင်းချီကို ဒီနေ့မှာ လွတ်ငြိမ်းချမ်းသာခွင့်ပြုခဲ့တာဖြစ်ပါတယ်။
