R.I.P 18 ကမ်ပိန်းပါ ဓါတ်ပုံများမှာ ပစ်သတ်ခံထားရခြင်းမဟုတ်

လက်နောက်ပြန်ကြိုး ချည်ထားခံရတဲ့ RCSS စစ်သားတွေရဲ့ပုံကို သျှမ်းပြည်မြောက်ပိုင်းတပ်မတော် SSPP အဖွဲ့က သေနတ်နဲ့ပစ်သတ်လို့ ၁၈ ယောက်သေသွားတယ်ဆိုပြီး လူမှုကွန်ရက် စာမျက်နှာပေါ်မှာဖြန့်ဝေမှုတွေ ရှိနေပါတယ်

ဒီဓါတ်ပုံတွေကတော့ သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA)နဲ့ သျှမ်းပြည်တိုးတက်ရေး ပါတီ၊ သျှမ်းပြည်တပ်မတော် (SSPP/SSA) ကြား မကြာခဏ တိုက်ပွဲတွေဖြစ်ပွားကြရာမှာ သီပေါမြို့နယ် အတွင်း မှာ ဖြစ်ပွားသွားခဲ့တဲ့ တိုက်ပွဲက ဓါတ်ပုံတွေပဲ ဖြစ်ပါတယ်။

ဒီဓါတ်ပုံတွေ လူမှုကွန်ယက်ပေါ်မှာ ပျံ့နှံ့အပြီးမှာ အနက်ရောင် နောက်ခံနဲ့ R.I.P 18 ဆိုတဲ့ ဖေစ့်ဘွတ်ကမ်ပိန်းဟာ သျှမ်းလူမျိုးအသိုင်းအဝန်းတွေရဲ့ လူမှုကွန်ရက် စာမျက်နှာတွေမှာ တရက်အတွင်း ပြန့်နှံ့ခဲ့ပါတယ်။ R.I.P 18 ကမ်ပိန်းဟာ RCSS/SSA ဘက်မှ ကျရှုံးသွားတဲ့ ရဲဘော်တွေကိုရည်ညွှန်းပြီး ဝမ်းနည်းတဲ့အနေနဲ့ ပရိုဖိုင်း ပုံအဖြစ်အသုံးပြုခဲ့ကြ တာဖြစ်ပါတယ်။


တချို့က R.I.P 18 ကမ်ပိန်းအဖြစ် ပရိုဖိုင်းပြောင်းလဲခြင်းသာ ပြုလုပ်သော်လည်း အချို့က ဓါတ်ပုံများအသုံးပြုပြီး ဖြန့်ဝေရာမှာ "ဝမ်းနည်းစရာ မတူညီသောစစ်တုန့်ပန်းတို့မြင်ကွင်း။ RCSS ဖက်ကဖမ်းမိရင် ထိုင်လျက်ထားပြီးအရှင်ပြန်လွတ်ပေးခဲ့တယ်။ တိုက်ပွဲမှာ စစ်သားတွေ ကံအကြောင်းမလှလို့သေတာမထူးဆန်းပေမယ့် အရှင်မိပြီးလက်နောက်ပြန်ကြိုးတုတ် ပြစ်သတ်တာတော့ ရှမ်းလူမျိုးတစ်ယောက်အနေနဲ့ စိတ်နာမိတယ်။" ဆိုပြီး ရေးသားထားကြတာပါ။

ရေးသားဖြန့်ဝေမှုတွေကို ဒီနေရာ နဲ့ ဒီနေရာ မှာ ကြည့်ရှု့နိုင်ပါတယ်။

သတင်းဆန်းစစ်ချက်

လူမှုကွန်ရက်ပေါ်မှာ ပြန့်နှံ့နေတဲ့ နောက်ပြန်ကြိုးတုတ်ပြီး မှောက်နေတဲ့ တပ်သားတွေဟာ အသက်ရှင်နေတဲ့ တပ်သားတွေဖြစ်ပြီး သတ်ဖြတ်လိုက်တာ မဟုတ်ကြောင်း SSPP/SSA ရဲ့ ပြောရေးဆိုခွင့်ရှိသူ ဗိုလ်မှူး စိုင်းဘုန်းဟန် က ပြောကြားထားကြောင်း SHAN News သတင်းဌာနမှာ ဖေဖေါ်ဝါရီ ၁၇ ရက်နေ့က ရေးသားဖော်ပြထားပါတယ်။


SHAN News သတင်းဌာနမှာ ဖော်ပြထားတဲ့ သတင်းအရ ဗိုလ်မှူး စိုင်းဘုန်းဟန်က RCSS ရဲ့ စစ်သုံ့ပန်းတွေကို သူတို့မိသားစုဝင်တွေနဲ့ ပြန်တွေ့နိုင်အောင် စီစဉ်ပေးထားပြီး လူနာတွေကိုလည်း ပြုစုနေတယ်လို့ ပြောဆိုထားပါတယ်။

စစ်သုံ့ပန်းတွေ သတ်ခံရတဲ့ကိစ္စ နဲ့ ပတ်သက်ပြီး RCSS/SSA ပြန်ကြားရေး ဗိုလ်မှူးခမ်းစံက မှတ်ချက်ပေးစရာမရှိကြောင်းနဲ့ ၁၈ ဦးသေဆုံးတယ်လို့လည်း ပြောလို့မရေကြောင်း၊ ရဲဘော်တွေ ထိခိုက်သေကျေတာ ရှိပေမယ့် ကိန်းဂဏန်းအတိအကျ မသိရှိရသေးကြောင်း ပြောကြားတယ်လို့ သတင်းမှာ ဖော်ပြထားပါတယ်။

သတင်းအပြည့်အစုံကို ဒီနေရာ မှာ ဖတ်ရှု့နိုင်ပါတယ်။

Claim :   လက်နောက်ပြန်ကြိုး ချည်ထားခံရတဲ့ RCSS စစ်သားတွေရဲ့ပုံကို သျှမ်းပြည်မြောက်ပိုင်းတပ်မတော် SSPP အဖွဲ့က သေနတ်နဲ့ပစ်သတ်လို့ ၁၈ ယောက်သေသွားတယ်ဆိုပြီး လူမှုကွန်ရက် စာမျက်နှာပေါ်မှာဖြန့်ဝေမှုတွေ ရှိနေတဲ့အပေါ် BOOM က သတင်းဆန်းစစ်ချက် ပြုလုပ်ထားပါတယ်။
Claimed By :  Facebook, Website
Fact Check :  False
Show Full Article
Next Story
Our website is made possible by displaying online advertisements to our visitors.
Please consider supporting us by disabling your ad blocker. Please reload after ad blocker is disabled.