ရဟတ်ယာဉ် မိုင်းခွဲမှု စစ်ကောင်စီတပ်သား အကုန်သေဆုံးဆိုတဲ့ သတင်းအမှား

ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ KH Daily ဆိုတဲ့ ဖေစ့်ဘွတ်ပေချ့်မှာ ဧပြီလ ၂၃ ရက်နေ့ နံနက်ပိုင်းမှာ စတင်ဖြန့်ဝေခဲ့တာဖြစ်ပြီး ထပ်ဆင့်ဖြန့်ဝေမှုတွေလည်း ရှိနေပါတယ်။

ဖြန့်ဝေရာမှာ ကြာချိန် ၈ မိနစ်နီးပါးရှိတဲ့ ဗွီဒီယိုဖိုင်တစ်ခုနဲ့အတူ ‘ရဟတ်ယာဉ် မိုင်းခွဲရပြီဗျို့။ ရဟတ်ယာဉ်ကွင်း ဗုံးထောင်ထားပြီး ရဟတ်ယာဉ်ဆင်းချိန် ဗုံးခွဲတိုက်ခိုက် ရဟတ်ယာဉ်နဲ့ စစ်ခွေးတွေပါ အကုန်သေပြီ’ လို့ ရေးသာထားတာပါ။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။

သတင်းဆန်းစစ်ချက်

အခုဖြန့်ဝေနေတာတွေဟာ အများပြည်သူကို မျှောလင့်ချက်အမှားတွေပေးတဲ့ သတင်းအမှားပဲ ဖြစ်ပါတယ်။ ဖြန့်ဝေထားတဲ့ ဗွီဒီယိုဖိုင်မှာ Burma VJ သတင်းဌာနမှာ ဧပြီလ ၂၂ ရက်နေ့က ဖော်ပြထားတဲ့ ‘ပျူရွာမှ စစ်ကောင်စီရှေ့တန်းစခန်းနှင့် ရဟတ်ယာဉ်ကွင်း ၂ ခု ဖျက်ဆီးနိုင်ခဲ့ဟု မင်းကင်း PDF ထုတ်ပြန်’ ဆိုတဲ့ သတင်းကို နောက်ခံစကားပြောနဲ့ ပြန်လည်ပြောဆို ထားတာသာ ဖြစ်ပါတယ်။

သတင်းထဲမှာ စစ်ကိုင်းတိုင်း၊ မင်းကင်းမြို့နယ် တောင်တွင်းဒေသက ပျူစောထီးရွာတစ်ခုဖြစ်တဲ့ မအူရွာက ပျူရှေ့တန်းစစ်စခန်းကို သိမ်းပိုက်ပြီး အရေးပေါ် ရဟတ်ယာဉ်ဆင်းကွင်း ၂ ခုကို ဖျက်ဆီးနိုင်ခဲ့ကြောင်း မင်းကင်း PDF က ထုတ်ပြန်တဲ့ သတင်းကို ပြန်လည် ကိုးကားရေးသားထားတာ ဖြစ်ပါတယ်။

ဒီသတင်းထဲမှာ ရဟတ်ယာဉ်ဆင်းချိန် ဗုံးခွဲတိုက်ခိုက်ပြီး ရဟတ်ယာဉ်နဲ့ စစ်ကောင်စီတပ်သားတွေ သေဆုံးတယ်ဆိုတဲ့ အကြောင်းအရာ မပါဝင်ပါဘူး။

သတင်းအပြည့်အစုံကို ဒီနေရာ မှာ ဝင်ရောက်ကြည့်ရှု့နိုင်ပါတယ်။

သတင်းအမှားဖြန့်ထားတဲ့ ပေ့ချ်တွေကို ဝင်ရောက်စစ်ဆေးကြည့်တဲ့အခါ ကြည့်ရှုသူအရေအတွက်များအောင် သတင်းခေါင်းစဉ်တွေမှာ လိမ်ညာပြီး ကြည့်ရှုသူအရေအတွက်ကနေ ဝင်ငွေပြန်ရနေတဲ့ Click baits သတင်းတွေ ဖြန့်နေတဲ့ အဖွဲ့ဖြစ်တာကို တွေ့ရပါတယ်။