NUG ဝန်ကြီးတွေကို အမေရိကန်ဖမ်းဆီးတယ်ဆိုတဲ့ သတင်းအမှား

ဒီအကြောင်းအရာကို Jay Videos ဆိုတဲ့ ဖေစ့်ဘွတ်ပေချ့်မှာ နိုဝင်ဘာ ၂၅ ရက်နေ့မှာ စတင်ဖြန့်ဝေခဲ့ တာဖြစ်ပြီး ၂၄ နာရီ မပြည့်မီ ထပ်ဆင့်ဖြန့်ဝေမှုတွေလည်း ရှိနေပါတယ်။

ဖြန့်ဝေရာမှာ ကြာချိန် ၂ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'ယုတ်မာလိုက်တာ။ NUG ဝန်ကြီးအားလုံး အမေရိကန် ဖမ်း။ အမေရိကန် ရဲ့ အကူအညီနဲ့ NUG အကြမ်းဖက်တွေကို ဖမ်းခွင့် ရခဲ့ပြီဟု ဇော်မင်းထွန်း ဒဲ့ ပြောလို့ လန့်ကုန်ပြီ' လို့ ရေးသား ထားပါတယ်။

ဗီဒီယို ထဲမှာလည်း NUG ဝန်ကြီး ဒေါ်ဇင်မာအောင်၊ ဦးရည်မွန်တို့ကို ဖမ်းဆီးချုပ်နှောင်ခံနေရတဲ့ ပုံ AI နဲ့ ပြုပြင်ပြီး ထည့်သွင်းကာ နောက်ခံစကားပြောနဲ့ ပြောဆိုထားပါတယ်။

ဖြန့်ဝေမှုကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။

သတင်းဆန်းစစ်ချက်

NUG ဝန်ကြီးတွေကို အမေရိကန်ဖမ်းဆီးတယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။

ဖြန့်ဝေထားတဲ့ ဗီဒီယိုထဲမှာ NUG ဝန်ကြီးတွေ ဖမ်းဆီးချုပ်နှောင်ခံနေရတဲ့ ပုံတွေကို AI နဲ့ ပြုပြင်ထည့်သွင်းကာ အမေရိကန်က NUG ဝန်ကြီးတွေကို ဖမ်းဆီးချုပ်နှောင်ခဲ့ကြောင်းနဲ့ သမ္မတ ထရမ့် လတ်တလော ထုတ်ပြန်ခဲ့တဲ့ မြန်မာနိုင်ငံ အခြေအနေတိုးတက်လာတဲ့အတွက် အမေရိကန်ရောက် မြန်မာတွေကို ပေးအပ်ထားတဲ့ ယာယီခိုလှုံခွင့် (TPS) ကို အမေရိကန်အစိုးရက ရုပ်သိမ်းတယ်ဆိုတဲ့ သတင်းတွေကို နောက်ခံစကားပြောနဲ့ ပြောဆိုထားတာပဲ ဖြစ်ပါတယ်။

ဗီဒီယိုရဲ့ ပထမပိုင်းမှာ ပြောဆိုထားတဲ့ အမေရိကန်က NUG ဝန်ကြီးတွေကို ဖမ်းဆီးချုပ်နှောင်ခဲ့တယ်ဆိုတဲ့ အကြောင်းအရာဟာ သတင်းအမှားသာ ဖြစ်ပြီး ဒီအကြောင်းအရာကို သက်ဆိုင်ရာ နိုင်ငံနဲ့ ယုံကြည်စိတ်ချရတဲ့ သတင်းဌာနတွေမှာ ဖော်ပြထားတာ မရှိပါဘူး။

အမေရိကန်ရောက် မြန်မာနိုင်ငံသားတွေကို ယာယီခိုလုံခွင့်ပြုတဲ့ (TPS) အစီအစဉ်ကို ရုပ်သိမ်းတော့မယ်လို့ အမေရိကန်အစိုးရက ထုတ်ပြန်တယ်ဆိုတဲ့ သတင်းအပြည့်အစုံကိုတော့ ဒီနေရာ နဲ့ ဒီနေရာ တွေမှာ ဝင်ရောက် ကြည့်ရှု့နိုင်ပါတယ်။

သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။