ကုလသမဂ္ဂမှာ NUG တရားဝင် အစိုးရဖြစ်ပြီဆိုတဲ့ သတင်းအမှား

ဒီသတင်းကို စက်တင်ဘာလ အစောပိုင်းကတည်းက သတင်းအမှားတွေ ဖြန့်ဝေလေ့ရှိတဲ့ ဖေစ့်ဘွတ်ပေချ့်တွေမှာ ဆက်တိုက် ဖြန့်ဝေနေတာဖြစ်ပြီး ထပ်ဆင့်ဖြန့်ဝေမှုတွေလည်း ရှိနေတာပါ။

ဒီသတင်းတွေကို လူစိတ်ဝင်စားမှု များနေတဲ့ ၇၇ ကြိမ်မြောက် ကုလသမဂ္ဂ အထွေထွေညီလာခံ မကျင်းပမီနဲ့ ကျင်းပနေစဉ်အတွင်းမှာ အချိန်ကိုက်ဖြန့်ဝေနေတာပါ။

ဖြန့်ဝေရာမှာ 'NUG တရားဝင်အစိုးရဖြစ်ပြီဟေ့။ ယနေ့ည NUG တရားဝင်အစိုးရ ဖြစ်ခွင့်ရပြီ။ ကုလမှာ NUG တရားဝင် အစိုးရဖြစ်ကြောင်း ခုလေးတင် ကြေညာလိုက်ပြီ' ဆိုပြီး အမျိုးမျိုးရေးသား ဖြန့်ဝေနေတာပါ။

ဖြန့်ဝေမှုတွေကို ဒီနေရာ၊ ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။

သတင်းဆန်းစစ်ချက်

ကုလမှာ NUG တရားဝင် အစိုးရဖြစ်ကြောင်း ခုလေးတင် ကြေညာလိုက်ပြီဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ သတင်းအတု ဖြစ်တာကို တွေ့ရပါတယ်။

လက်ရှိမှာ နိုင်ငံကို ကိုယ်စားပြုခွင့်နဲ့ ပတ်သက်ပြီး NUG နဲ့ စစ်ကောင်စီတို့ အပြိုင်လျှောက်ထားကြမှုတွေကို အရည်ချင်းစစ် ကော်မတီက နိုဝင်ဘာလအတွင်းမှာမှ စိစစ်သွားမှာဖြစ်ပြီး ကုလ အထွေထွေညီလာခံကြီးက အတည်ပြုနိုင်ဖို့ရာ အကြံပြုကြမှာ ဖြစ်ပါတယ်။

ပြီးခဲ့တဲ့နှစ်က နိုင်ငံကို ကိုယ်စားပြုခွင့် လျှောက်ထားမှုနဲ့ ပတ်သက်ပြီး ဆုံးဖြတ်ချက်မချဘဲ ရွှေ့ဆိုင်းခဲ့ရာမှာ မြန်မာ သံအမတ်ကြီး ဦးကျော်မိုးထွန်းက ကုလမှာ ဆက်ရှိနေနိုင်ခဲ့ပါတယ်။

ကုလသမဂ္ဂမှာ ဦးကျော်မိုးထွန်းကို ဆက်ခန့်ထားဖို့ အခြေအနေကောင်းကြောင်း NUG ဒုနိုင်ငံခြားရေးဝန်ကြီး ဦးဇော်မိုးထွန်းက ပြောဆိုထားတာကို DVB သတင်းဌာနမှာ စက်တင်ဘာလ ၅ ရက်နေ့က ဖော်ပြထားပါသေးတယ်။

ဦးဇော်မိုးထွန်းရဲ့ ပြောကြားချက်အရ မြန်မာသံအမတ်ကြီး ဦးကျော်မိုးထွန်းဟာ ကုလသမဂ္ဂမှာ အရင်အတိုင်းဆက်လက်ရှိနေပြီး ကိုယ်စားပြုခွင့် ဆုံးဖြတ်ချက်ကိုလည်း မနှစ်ကအတိုင်း ရွှေ့ဆိုင်းဘို့ ပိုများတယ်လို့ ယူဆကြောင်း ပြောကြားထားတာပါ။ သူက ဆက်လက်ပြီး ဒီလိုသိရတဲ့ အကြောင်းတွေဟာ ရာခိုင်နှုန်းပြည့် စိတ်ချရမှုတော့ မရှိသေးကြောင်း ပြောကြားထားပါတယ်။

DVB သတင်းဌာနမှာ ဖော်ပြထားတဲ့ သတင်းမူရင်းကို ဒီနေရာ မှာ ကြည့်ရှု့နိုင်ပါတယ်။