စစ်ကော်မရှင်က ဒေါ်အောင်ဆန်းစုကြည်ရဲ့ အမှုတွေကို ရုတ်သိမ်းကြောင်း ကြေညာတယ်ဆိုတဲ့ သတင်းအမှား

ဒီအကြောင်းအရာကို Yangon Khit Thit ဆိုတဲ့ Youtube ချန်နယ်တစ်ခုမှာ နိုဝင်ဘာလ ၂၈ ရက်နေ့မှာ စတင်ဖြန့်ဝေခဲ့တာ ဖြစ်ပြီး ဝင်ရောက်ကြည့်ရှု့သူ အများအပြား ရှိနေပါတယ်။

ဖြန့်ဝေရာမှာ ကြာချိန် ၁၀ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'နေပြည်တော် အချုပ်ထောင် ဒေါ်စု အမှု ရုတ်သိမ်းကြောင်း ကြေညာ။ အမေရိကန် ဖိအားကြောင့် မင်းအောင်လှိုင်ကိုယ်တိုင် ကြေညာ လိုက်ရပြီ ၊ ပြည်သူထောင်ချီ ကြိုဆိုနေကြပြီ' လို့ ရေးသားထားပါတယ်။

ဖြန့်ဝေမှုကို ဒီနေရာ မှာ ဝင်ရောက်ကြည့်ရှုနိုင်ပါတယ်။

သတင်းဆန်းစစ်ချက်

စစ်ကော်မရှင်က ဒေါ်အောင်ဆန်းစုကြည်ရဲ့ အမှုတွေကို ရုတ်သိမ်းကြောင်း ကြေညာတယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။

ဖြန့်ဝေထားတဲ့ ဗီဒီယိုထဲမှာ People's Spring သတင်းဌာနမှာ နိုဝင်ဘာ ၂၇ ရက်နေ့က ဖော်ပြထားတဲ့ 'စစ်အုပ်စုက လွတ်ခါနီးနိုင်ကျဥ်း​တွေကို လွှတ်ပေးပြီး​ရွေး​ကောက်ပွဲအတွက်လို့ပြောတာဟာ နိုင်ငံ​ရေးအရ အသုံးချတာလို့ နိုင်ကျဥ်း​တွေ​ပြော' ဆိုတဲ့ သတင်းကို နောက်ခံစကားပြောနဲ့ ပြန်လည်ပြောဆို ထားတာသာ ဖြစ်ပါတယ်။

သတင်းထဲမှာ စစ်ကောင်စီဟာ လွတ်ခါနီးပြီဖြစ်တဲ့ နိုင်ငံ​ရေးအကျဉ်းသားတွေ လွှတ်ပေးပြီး စစ်တပ်​ရွေး​ကောက်ပွဲအတွက် ​မဲ​ပေးနိုင်​အောင် လွှတ်​​ပေးတယ်​​ပြောတာဟာ မရိုးသားတဲ့ နိုင်ငံရေးအရ အသုံးချတာသာ ဖြစ်တယ်လို့ နိုင်ငံ​ရေးအကျဥ်းသား​ဟောင်း​တွေက ​ပြောကြားကြောင်း၊ မြန်မာနိုင်ငံရဲ့ အုပ်ချုပ်ရေးနဲ့ တည်ငြိမ်မှုတွေက ထင်သာမြင်သာ တိုးတက်လာနေပြီလို့ အမေရိကန် အမိမြေလုံခြုံရေးဝန်ကြီးဌာနက မှတ်ချက်ပေးပြီး ရက်ပိုင်းအကြာမှာဘဲ စစ်အုပ်စုက ရာဇသတ်ကြီးပုဒ်မ ၅၀၅ -ကနဲ့ မတရားဖမ်းဆီးအကျဉ်းချထားတဲ့သူတွေကို လွတ်ငြိမ်းခွင့်ပေးခဲ့ကြောင်း၊ စစ်အုပ်ဟာပုဒ်မ ၅၀၅-က အရ ပြစ်ဒဏ်ကျခံထားသူ ၇၂၄ ဦးကို ခံဝန် နဲ့ ၂၃၆၁ ဦး ကို ပြစ်ဒဏ်လျှော့ပေါ့ပြီး လွတ်ငြိမ်းခွင့်နဲ့ တရားစွဲဆိုခံရပြီး ထွက်ပြေးတိမ်းရှောင်နေသူ ၅၅၈၀ ဦးကို အမှုတွေ ပိတ်သိမ်းပေးခဲ့တယ်လို့ နိုဝင်ဘာ ၂၆ရက်မှာ ထုတ်ပြန်ခဲ့ကြောင်း ရေးသားထားပါတယ်။

စစ်ကောင်စီက နိုဝင်ဘာ ၂၆ရက် ညပိုင်းက ကြေညာအပြီး နိုဝင်ဘာ ၂၇ရက် မနက်ပိုင်းမှာ ပုဒ်မ ၅၀၅ -ကနဲ့ မတရားဖမ်းဆီး အကျဉ်းချထားတဲ့ သူတွေကို လွှတ်ပေးနေတာ​မှာ NLD ပါတီရဲ့ ဗဟိုပြန်ကြားရေး အဖွဲ့ဝင်တစ်ဦးဖြစ်တဲ့ ဦးကြည်တိုးနဲ့ တကသ ကျောင်းသားဟောင်းများအင်အားစု တွဲဖက်တည်ထောင်သူနဲ့ အလွတ်တန်း ဓာတ်ပုံသတင်းထောက် ကိုဖိုးသားတို့ လွတ်မြောက်လာတာ တွေ့ရပေမယ့် ဒေါ်အောင်ဆန်းစုကြည် နဲ့ သမ္မတ ဦးဝင်းမြင့်တို့နဲ့ ပက်သတ်တဲ့ သတင်းတော့ ထုတ်ပြန်ထားတာ မရှိပါဘူး

People's Spring သတင်းဌာနမှာ ဖော်ပြထားတဲ့ သတင်းကို ဒီနေရာ မှာ ဝင်ရောက်ကြည့်ရှု့နိုင်ပါတယ်။

သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။