ဝမ်ယိကို ဒေါ်အောင်ဆန်းစုကြည်နဲ့ တွေ့ဆုံခွင့်ပေးတယ်လို့ စစ်ကောင်စီထုတ်ပြန်တယ်ဆိုတဲ့ သတင်းအမှား

ဒီအကြောင်းအရာကို Yangon Khit Thit ဆိုတဲ့ Youtube ချန်နယ်တစ်ခုမှာ ဩဂုတ် ၂၈ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။

ဖြန့်ဝေရာမှာ ကြာချိန် ၁၃ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'ဝမ်ယိနဲ့ တွေ့ဆုံခွင့်ပေးပြီ။ သဘောတူညီချက် ရရှိကြောင်း စစ်ကောင်စီ ထုတ်ပြန်လာ။ ဒေါ်စုကို ပွဲထုတ်လာပြီ' လို့ ရေးသားထား တာပါ။

ဖြန့်ဝေမှုကို ဒီနေရာ မှာ ဝင်ရောက် ကြည့်ရှု့နိုင်ပါတယ်။

သတင်းဆန်းစစ်ချက်

ဝမ်ယိကို ဒေါ်အောင်ဆန်းစုကြည်နဲ့ တွေ့ဆုံခွင့်ပေးတယ်လို့ စစ်ကောင်စီထုတ်ပြန်တယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။

ဖြန့်ဝေထားတဲ့ အကြောင်းအရာဟာ ဧရာဝတီသတင်းဌာနမှာ ဩဂုတ် ၂၆ ရက်နေ့က ဖြန့်ဝေထားတဲ့ 'စကမ ရွေးကောက်ပွဲနှင့် တရုတ်သဘောထား' ဆိုတဲ့ ဆောင်းပါးကို နောက်ခံ စကားပြောနဲ့ ပြန်လည် ပြောဆိုထားတဲ့ ရုပ်သံဖိုင်ပဲ ဖြစ်ပါတယ်။

ဒီဆောင်းပါးထဲမှာ တရုတ်နိုင်ငံခြားရေးဝန်ကြီး မစ္စတာ ဝမ်ယိနဲ့ စကမ နိုင်ငံခြားရေးဝန်ကြီး ဦးသန်းဆွေတို့ ယူနန်ပြည်နယ်၊ အန်နင်းမြို့မှာ ဒီလအစောပိုင်းက တွေ့ဆုံးခဲ့ကြောင်း၊ တွေ့ဆုံးမှုမှာ ဝမ်ယိက ရွေးကောက်ပွဲနဲ့ ပတ်သက်ပြီး ရည်မှန်းချက် ၃ ရပ် အကောင်အထည်ဖော်သင့်တို့ ပြောကြောင်း၊ သို့သော် စကမက ရွေးကောက်ပွဲကို တရုတ်တို့က ထောက်ခံတယ်လို့ ပုံဖော်တဲ့အတွက် ဝေဖန်မှုတွေ ပေါ်ထွက်ခဲ့ကြောင်း၊ ဒိအတွက် တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်က အထွေထွေရွေးကောက်ပွဲဟာ မြန်မာနိုင်ငံရဲ့ ပြည်တွင်းရေးဖြစ်တဲ့အတွက် ရွေးကောက်ပွဲကို ထောက်ခံခြင်း ကန့်ကွက်ခြင်း မရှိဘူးလို့ တရုတ်ရဲ့ သဘောထားကို ထပ်မံဖော်ပြခဲ့ကြောင်း စတဲ့ ရွေးကောက်ပွဲနဲ့ ပတ်သက်တဲ့ အကြောင်းအရာတွေကို ရေးသားထားတာပါ။

ဒီဆောင်းပါးထဲမှာ ဝမ်ယိကို ဒေါ်အောင်ဆန်းစုကြည်နဲ့ တွေ့ဆုံခွင့်ပေးတယ်လို့ စစ်ကောင်စီထုတ်ပြန်တယ်ဆိုတဲ့

အကြောင်းအရာ မပါဝင်သလို တခြားယုံကြည်စိတ်ချရတဲ့ သတင်းဌာနတွေမှာလည်း ဖော်ပြထားတာ မရှိပါဘူး။

ဧရာဝတီသတင်းဌာနမှာ ဖော်ပြထားမှုကို ဒီနေရာ မှာ ဝင်ရောက်ကြည့်ရှု့နိုင်ပါတယ်။

သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။