တပ်မ ၅၄ တပ်ရင်း တစ်ခုလုံး KPDF သိမ်းတယ်ဆိုတဲ့ သတင်းအမှား

အဆိုပါ သတင်းအမှားကို ဖေ့စ်ဘွတ်အကောင့်ပေါင်းများစွာနဲ့ ဇွန်လ ၁၂ ရက်နေ့မှာ လူမှုကွန်ယက်ပေါ် ဖြန့်ဝေခဲ့ကြတာ ဖြစ်ပြီး ဓါတ်ပုံ ၄ ပုံ အသုံးပြုထားပါတယ်။ အဲ့ဒီ ဓါတ်ပုံ ၄ ပုံနဲ့အတူ "သောင်းလှိုင်သားရေ ခများသားသမီးတေတော့ PDF တွေကို တပ်ရင်းလိုက်လှူကုန်ပြီ။ ယမန်နေ့လွိုင်ကော် တပ်ရင်း ၅၄ တစ်ရင်းလုံးသိမ်း" လို့ ရေးသားထားပါတယ်။

၎င်း အသုံးပြုထားတဲ့ ဓါတ်ပုံ ၄ ပုံဟာ တိုက်ပွဲမှာ သိမ်းဆည်းရမိတဲ့ သေနတ်တွေ၊ စစ်ဝတ်စုံတွေ၊ ထမင်းပန်းကန်၊ ဟန်းကောဂျိုင့်တွေ၊ ရေဘူးတွေ၊ လက်နက်ကြီးတွေ စုပုံ ချထားတဲ့ ဓါတ်ပုံတွေ ဖြစ်ပြီး လွိုင်ကော်မှာ သိမ်းဆည်းရမိထားတဲ့ ပစ္စည်းတွေ ဖြစ်တယ်လို့ ဖြန့်ဝေထားပါတယ်။

မူရင်းရေးသားဖြန့် ဝေမှုကို ဒီမှာ ကြည့်ပါ။

သတင်းဆန်းစစ်ချက်

လွိုင်ကော်မှာ တပ်မ ၅၄ တပ်ရင်းတစ်ခုလုံး ပြုတ်အောင် ကယား PDF က တိုက်ခိုက်ခဲ့တယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ၂၀၁၅ ခုနှစ်က ကိုးကန့်နဲ့ စစ်ကောင်စီတပ်တွေ တိုက်ခဲ့တဲ့ တိုက်ပွဲမှာ တပ်မ ၃၃ ရှုံးနှိမ့်ပြီး လက်နက်တွေ သိမ်းဆည်းခံရတဲ့ ပုံဟောင်းတွေကို အသုံးပြုထားတာ တွေ့ရပါတယ်။

အဆိုပါ ဖြန့်ဝေထားတဲ့ သတင်းအမှားနဲ့ ပတ်သက်ပြီးတော့လည်း ကယားပြည်သူ့ကာကွယ်ရေးတပ်ဖွဲ့ Karenni People Defense Force – KPDF က ၎င်းတို့ရဲ့ ဖေ့စ်ဘွတ်စာမျက်နှာမှာ "လွိုင်ကော် တပ်ရင်း ၅၄ တပ်ရင်းလုံးကို PDF တွေသိမ်း ဆိုတဲ့သတင်းအမှား ပုံသည် 2015 ကိုးကန့်တိုက်ပွဲမှာ တပ်မ ၃၃ အလဲထိုး ရှုံးခဲ့တဲ့ပုံဖြစ်ပါသည်။ Fake news သတင်းအမှားများအား ဖြန့်‌ေဝခြင်းဟာ မြေပြင် ပြည်သူအချို့အတွက် အန္တရာယ်ဖြစ်စေနိုင်ပါတယ်" လို့ ရေးသားထားပါတယ်။

KPDF Page က တင်ထားတဲ့ အကြောင်းအရာ ကို ဒီမှာ ဖတ်ပါ။