NUG အပြီးသတ် ဖျက်သိမ်းပြီး အစိုးသစ်ဖွဲ့စည်းတယ်ဆိုတဲ့ သတင်းအမှား

ဒီအကြောင်းအရာကို Mandalay khitThit ဆိုတဲ့ Youtube ချန်နယ်တစ်ခုမှာ ဩဂုတ် ၂၆ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။

ဖြန့်ဝေရာမှာ ကြာချိန် ၈ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'NUG အပြီးသတ်ဖျက်သိမ်း။ အစိုးရသစ်ဖွဲ့စည်းပြီး သမ္မတသစ်ကြေညာ။ NUG စစ်ဦးစီးချုပ်နေရာ ဗိုလ်ချုပ်ထွန်းမြတ်နိုင် တာဝန်ယူပြီး သမ္မတနေရာ ဗိုလ်ချုပ်ဂွမ်မော် တာဝန်ယူပြီ' လို့ ရေးသားထား တာပါ။

ဖြန့်ဝေမှုကို ဒီနေရာ မှာ ဝင်ရောက် ကြည့်ရှု့နိုင်ပါတယ်။

သတင်းဆန်းစစ်ချက်

NUG အပြီးသတ် ဖျက်သိမ်းပြီး အစိုးသစ်ဖွဲ့စည်းတယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။

ဖြန့်ဝေထားတဲ့ အကြောင်းအရာဟာ Than Lwin Times သတင်းဌာနမှာ ဩဂုတ် ၂၆ ရက်နေ့က ဖြန့်ဝေထားတဲ့ 'စနစ်ပြောင်းတော်လှန်ရေး ဆက်လုပ်သွားမယ်လို့ NUG ပြော' ဆိုတဲ့ သတင်းကို နောက်ခံ စကားပြောနဲ့ ပြန်လည် ပြောဆိုထားတဲ့ ရုပ်သံဖိုင်ပဲ ဖြစ်ပါတယ်။

ဒီသတင်းထဲမှာ စစ်အုပ်စုကနေ ဒီနှစ်ကုန်ပိုင်းအတွင်းဦးဆောင်ကျင်းပမယ့် တရားမဝင်အတုအယောင် ရွေးကောက် ပွဲနဲ့ ပတ်သက်ပြီး အမျိုးသားညီညွတ်ရေးအစိုးရ NUG ရဲ့ ရပ်တည်ချက်နဲ့ သဘောထားကို ဩဂုတ် ၂၄ ရက်နေ့မှာ အသိပေး ကြေညာခဲ့ကြောင်း၊ ကြေညာချက်ထဲမှာ မဟာမိတ်တိုင်းရင်းသားအဖွဲ့တွေ အပါအဝင် တော်လှန်ရေး အင်အားစုတွေနဲ့ လက်တွဲကာ မိမိတို့ရဲ့ ပင်မနိုင်ငံရေးလမ်းကြောင်းပါ မူဘောင်အတိုင်း ရပ်တည်ကာ စနစ်ပြောင်းတော်လှန်ရေးကို ဆက်လုပ်သွားမှာဖြစ်ကြောင်း၊ NUG အနေနဲ့ စစ်တပ်က ကြိုးကိုင်ထားတဲ့ ဟန်ပြ နိုင်ငံရေးလှည့်စားမှု မဟုတ်ဘဲ ပြည်သူက တွန်း အားပေးတဲ့ အားလုံးပါဝင်နိုင်မှုရှိတဲ့ ဒီမိုကရေစီနည်းကျတဲ့ လုပ်ငန်းစဉ်ကသာ မြန်မာနိုင်ငံရဲ့ အနာ ဂတ်ကို အမှန်တကယ် ဆုံးဖြတ်ပေးနိုင်မယ်လို့ ယုံကြည်ကြောင်း တွေ ရေးသားထားတာပါ။

ဒီသတင်းထဲမှာ NUG အပြီးသတ် ဖျက်သိမ်းပြီး အစိုးသစ်ဖွဲ့စည်းတယ်ဆိုတဲ့ အကြောင်းအရာ မပါဝင်သလို တခြား ယုံကြည်စိတ်ချရတဲ့ သတင်းဌာနတွေမှာလည်း ဖော်ပြထားတာ မရှိပါဘူး။

Than Lwin Times သတင်းဌာနမှာ ဖော်ပြထားမှုကို ဒီနေရာ မှာ ဝင်ရောက်ကြည့်ရှု့နိုင်ပါတယ်။

သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။