အင်တာနက်လိုင်းတွေ ဖြတ်တောက်မယ်ဆိုတဲ့ သတင်းအမှား
အင်တာနက်လိုင်းများ အချိန်အကန့်အသတ်မရှိ ဖြတ်တောက်တော့မယ်လို့ MRTV ရုပ်သံလိုင်းမှာ အရေးပေါ် ကြေညာလိုက်တယ်ဆိုပြီး လူမှုမီဒီယာတွေပေါ် ဖြန့်ဝေနေတာ တွေဟာ ပုံမှန်ဖြန့်နေကျ သတင်းအမှားတွေပဲ ဖြစ်ပါတယ်။
ဒီသတင်းအမှားကို စက်တင်ဘာလ ၄ ရက်နေ့ မတိုင်မီကတည်းက စတင်ဖြန့်ဝေနေတာဖြစ်ပြီး စက်တင်ဘာလ ၆ ရက်နေ့ ညနေ ၅ နာရီဝန်းကျင်မှာတော့ ဖြန့်ဝေသူ အလွန်များလာပြီး နာရီပိုင်းအတွင်းမှာပင် ထပ်ဆင့်ဖြန့်ဝေသူတွေ ထောင်ချီရှိခဲ့ပါတယ်။
ဖြန့်ဝေရာမှာ "ယနေ့ (စက်တင်ဘာလ ၆ ရက်နေ့) ည ၁၀ နာရီခွဲမှာ အင်တာနက်တွေ စတင်ပိတ်မယ်လို့ MRTV က ကြေညာလိုက်ပြီ" ဆိုပြီး ဖြန့်ဝေနေတာပါ။ ဖြန့်ဝေသူတချို့က ည ၁၀ နာရီခွဲနောက်ပိုင်းမှာ ပိုစ့်တွေပြန်ဖျက်ခဲ့ကြသလို တချို့က သတင်းအမှားဖြစ်တယ်ဆိုပြီး ပြန်ပြင်ရေးသားထားတာလည်း တွေ့ရပါတယ်။
တကယ်တော့ အင်တာနက်လိုင်းတွေ ဖြတ်နိုင်တယ်ဆိုတဲ့ သတင်းကို သြဂုတ်လ ၁၈ ရက်ဝန်းကျင်က စတင်ဖြန့်ဝေနေတာဖြစ်ပြီး တချို့ဘလောဂ့်တွေမှာတော့ စက်တင်ဘာလ ၆ ရက်နေ့မှာ ဖြတ်မယ်ဆိုပြီး ရက်စွဲအတိအကျနဲ့ ရေးသားနေတာပါ။
ရေးသားဖြန့်ဝေမှုတွေကို ဒီနေရာ၊ ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
သတင်းဆန်းစစ်ချက်
အင်တာနက်လိုင်းတွေကို စက်တင်ဘာလ ၆ ရက်နေ့ ည ၁၀ နာရီခွဲမှာ စတင်ဖြတ်တောက်မယ်လို့ ရေးသားဖြန့်ဝေနေပေမယ့် ယခုအချိန်ထိ ဖြတ်တောက်ခြင်းမရှိသေးတဲ့ အတွက် ဒါဟာ သတင်းအမှားသာ ဖြစ်ပါတယ်။
နောက်ထပ် ဒီသတင်းကို MRTV မှာ အရေးပေါ် ကြေညာခဲ့တယ်ဆိုတာလည်း မမှန်ပါ။ MRTV ရဲ့ သတင်းတွေကို ဒီနေရာ မှာ ဝင်ရောက်ကြည့်ရှု့နိုင်ပါတယ်။