စစ်တပ်က ဗုံးမှားကြဲလို့ တရုတ်တပ်သား အများအပြား သေဆုံးတယ်ဆိုတဲ့ သတင်းအမှား

ဒီအကြောင်းအရာကို Yangon Khit Thit ဆိုတဲ့ Youtube ချန်နယ်တစ်ခုမှာ ဩဂုတ် ၂၇ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။

ဖြန့်ဝေရာမှာ ကြာချိန် ၉ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'ဗုံးမှားကြဲလို့ တရုတ်တပ်အများအပြား သေဆုံး။ ကျောက်ဖြူမှာ စစ်တပ်ဗုံးမှားကြဲလို့ ပြသနာတက်နေပြီ။ တရုတ်ကောင်စီရုံးက ဆင့်ခေါ်' လို့ ရေးသားထား တာပါ။

ဖြန့်ဝေမှုကို ဒီနေရာ မှာ ဝင်ရောက် ကြည့်ရှု့နိုင်ပါတယ်။

သတင်းဆန်းစစ်ချက်

စစ်တပ်က ဗုံးမှားကြဲလို့ တရုတ်တပ်သား အများအပြား သေဆုံးတယ်ဆိုတဲ့ အကြောင်းအရာကို Boom Myanmar က အချက် အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။

ဖြန့်ဝေထားတဲ့ အကြောင်းအရာဟာ Narinjara သတင်းဌာနမှာ ဩဂုတ် ၂၇ ရက်နေ့က ဖြန့်ဝေထားတဲ့ 'ကျောက်ဖြူမှာ တည်နေရာမှားယွင်းဗုံးကြဲတဲ့အတွက် အကြမ်းဖက်စစ်တပ်အသေအပျောက် အထိအခိုက်ရှိနိုင်တယ်လို့ဆို' ဆိုတဲ့ သတင်းကို နောက်ခံ စကားပြောနဲ့ ပြန်လည် ပြောဆိုထားတဲ့ ရုပ်သံဖိုင်ပဲ ဖြစ်ပါတယ်။

ဒီသတင်းထဲမှာ အကြမ်းဖက် စစ်တပ်က တည်နေရာမှားယွင်းဗုံးကြဲခဲ့တဲ့အတွက် ကျောက်ဖြူမြို့နယ် ရှေ့တန်းမှာ ရောက်ရှိနေတဲ့ စစ်တပ်စစ်ကြောင်းတစ်ခုပေါ်ကို ဗုံးကျရောက်ပေါက်ကွဲခဲ့တာကြောင့် အသေအပျောက်ရှိနိုင်တယ်လို့ ရေးသားထားတာပါ။

စစ်တပ်က ကျောက်ဖြူမှာ ဗုံးမှားကြဲခဲ့တာ မှန်ပေမယ့် တရုတ်တပ်သား အများအပြား သေဆုံးတယ်ဆိုတာ မဟုတ်ပါဘူး။

ဒီသတင်းထဲမှာလည်း စစ်တပ်က ဗုံးမှားကြဲလို့ တရုတ်တပ်သား အများအပြား သေဆုံးတယ်ဆိုတဲ့ အကြောင်းအရာ မပါဝင်သလို တခြားယုံကြည်စိတ်ချရတဲ့ သတင်းဌာနတွေမှာလည်း ဖော်ပြထားတာ မရှိပါဘူး။

Narinjara သတင်းဌာနမှာ ဖော်ပြထားမှုကို ဒီနေရာ မှာ ဝင်ရောက်ကြည့်ရှု့နိုင်ပါတယ်။

သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။