တော်လှန်ရေးမအောင်ရင် အရှက်ရမယ်လို့ မန်းဝင်းခိုင်သန်း မပြောထားပါ

ဒီအကြောင်းအရာကို ဒီဇင်ဘာလ ၂၈ ရက်နေ့မှာ စစ်ကောင်စီကို ထောက်ခံအားပေးတဲ့ ဖေ့စ်ဘွတ်အကောင့်တွေ ပေ့ချ်တွေကနေ တဆင့် ဖြန့်ဝေခဲ့တာ ဖြစ်ပြီး သတင်းစာဖြတ်ပိုင်းပါ သတင်းပုံစံဖန်တီးထားပါတယ်။ ၎င်းသတင်းရဲ့ ခေါင်းစဉ်မှာ "တော်လှန်ရေးအား လာမည့် ၆ လအတွင်း အောင်မြင်စွာ အဆုံးသတ်ရန်နှင့် မအောင်မြင်ပါက အရှက်နှင့်သာ ရင်ဆိုင်ရနိုင်ကြောင်း မန်းဝင်းခိုင်သန်းပြော" လို့ ရေးသားထားတာဖြစ်ပါတယ်။

၎င်းသတင်းအမှားရဲ့ အတွင်းမှာ "အောက်တိုဘာလ ၁၉ ရက်က ကျင်းပသည့် အမျိုးသားညီညွတ်ရေးအစိုးရအဖွဲ့ ပုံမှန်အစည်းအဝေး (၂၈/၂၀၂၁) တွင် ပြောကြားလိုက်ခြင်း ဖြစ်သည်။ အမျိုးသားညီညွတ်ရေးအစိုးရ တာဝန်ယူလာခဲ့ကြတာ ၆ လ ရှိသွားပြီ မယ်မယ်ရရ ဘာမှ မလုပ်နိုင်ကြဘူး။ အလှူခံငွေတွေ မျှော်ကိုးနေလို့ မရဘူး။ မိမိတို့ ဝန်ကြီးဌာနများရဲ့ လုပ်နိုင်စွမ်းတွေကို ပြန်လည်သုံးသပ်ကြပြီး လိုအပ်ချက်ရှိတဲ့ အပိုင်းတွေ ပြင်ဆင်ကြဖို့လိုကြောင်း နောက် ၃ လ အတွင်း ဘာတွေအောင်မြင်အောင် လုပ်ကြမလဲ ပြင်ဆင်ကြဖို့ လိုအပ်ကြောင်း၊ နောက် ၆ လ ဆိုရင် ဒီတော်လှန်ရေးကို ဘယ်လိုအဆုံးသတ်ကြမလဲ ကျွန်တော်တို့လဲ အတော်လေးပင်ပန်းနေကြပြီ၊ အဆုံးသတ်မှာ မအောင်မြင်ရင် အရှုံးနဲ့ အရှက်နဲ့သာ ရင်ဆိုင်ရနိုင်ကြောင်း ပြည်တွင်းမှာလည်း PDF များ အကျအဆုံးများနေ၍ ပြန်လည်သုံးသပ်ရန် မှာကြားခဲ့ပါတယ်" (မူရင်းရေးသားထားသည့်အတိုင်း) လို့ ရေးသားထားပါတယ်။

မူရင်းရေးသားဖြန့်ဝေမှုကို ဒီနေရာ ၊ ဒီနေရာ ၊ ဒီနေရာ နဲ့ ဒီနေရာမှာ ကြည့်ပါ။

သတင်းဆန်းစစ်ချက်

NUG အစိုးရရဲ့ ဒုသမ္မတ မန်းဝင်းခိုင်သန်းက တော်လှန်ရေးက ၆ လ အတွင်းမအောင်မြင်ရင် ရှက်စရာ ကောင်းကြောင်း၊ အလှူငွေတွေ မျှော်ကိုးနေရပြီး PDF များစွာ ကျဆုံးနေတယ်လို့ အမျိုးသားညီညွတ်ရေးအစိုးရအဖွဲ့ ပုံမှန်အစည်းအဝေး (၂၈/၂၀၂၁) မှာ ပြောထားတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ သတင်းအမှားဖြစ်ကြောင်း တွေ့ရပါတယ်။

ဖြန့်ဝေမှုထဲမှာ ရည်ညွှန်းထားတဲ့ အဆိုပါ (၂၈/၂၀၂၁) အစည်းအဝေးမှာ ယာယီသမ္မတက စစ်ကောင်စီ နဲ့ စစ်ဗိုလ်တွေရဲ့ မတရားကြီးပွားနေတဲ့ စီးပွားရေးလုပ်ငန်းတွေနဲ့ ဝင်ငွေတွေကို ထိရောက်စွာပိတ်ဆို့ နိုင်ဖို့ အရေးကြီးကြောင်း၊ အမျိုးသားညီညွတ်ရေး အစိုးရသက်တမ်း ၆ လတာ အတွင်း အောင်မြင်မှု၊ ကျဆုံးမှု၊ စိန်ခေါ်မှုတွေကို သုံးသပ်ပြီး တော်လှန်ရေးအောင်မြင်ဖို့ ကြိုးပမ်းပြင်ဆင်သွားဖို့ လိုကြောင်း၊ တော်လှန်ရေးအတွက် အားတက်စရာ သတင်းတွေ ကြားနေရကြောင်း၊ ကျန်တဲ့ အခက်အခဲတွေကိုလည်း ပိုမိုအားစိုက်ပြီး ဖြေရှင်းဖို့ ကြိုးစားသွားမယ် ဖြစ်ကြောင်းစတဲ့အချက်တွေကိုသာ ပြောထားတာ ဖြစ်ပါတယ်။

အောက်တိုဘာလ ၁၉ ရက်နေ့က ပြုလုပ်ခဲ့တဲ့ အမျိုးသားညီညွတ်ရေးအစိုးရအဖွဲ့ ပုံမှန်အစည်းအဝေး (၂၈/၂၀၂၁) မှာ ဆွေးနွေးပြောကြားခဲ့တဲ့ အကြောင်းအရာတွေကို ဒီမှာ ကြည့်ပါ။ဒီအကြောင်းအရာတွေဟာ အွန်လိုင်းသတင်းဌာနတချို့မှာသာတင်ဆက်ခဲ့တာဖြစ်ပြီး ဖြန့်ဝေမှုတွေမှာပါဝင်သလို သတင်းစာ စာမျက်နှာတွေပေါ်မှာရေးသားခဲ့တဲ့ သတင်းမျိုးမရှိခဲ့ပါဘူး။ အဲ့ဒီအပြင် ပုံမှာမြင်တွေ့ရတဲ့ သတင်းမျိုး ပြောဆိုမှုမျိုးကိုလည်း ထုတ်ပြန်ပြောဆိုထားခြင်းမရှိခဲ့ပါဘူး။

သတင်းအမှားဖြန့်ထားတဲ့ ဖေ့စ်ဘွတ်အကောင့်တွေကို ဝင်ရောက်စစ်ဆေးကြည့်တဲ့အခါ မည်သူမည်ဝါမှန်း ဖော်ပြထားခြင်းမရှိတဲ့ အကောင့်တုတွေ ဖြစ်ကြောင်းတွေ့ရပြီး အဲ့ဒီအကောင့်တွေမှာဘာသာရေးသွေးထိုးလှုံ့ဆော်တဲ့ သတင်းအမှားတွေ၊ စစ်ကောင်စီကို ထောက်ခံအားပေးတဲ့ သတင်းတွေ၊ NUG ၊ CRPH နဲ့ PDF တွေကို တိုက်ခိုက်တဲ့ သတင်းအမှားတွေ ဆက်တိုက်တင်နေတာကို တွေ့ရပါတယ်။