KNU တပ်မဟာ ၆ အကြောင်း ဖြန့်ဝေထားတဲ့ သတင်းအမှား

လူမှုကွန်ယက်ပေါ်မှာ KNU တပ်မဟာ ၆ အကြောင်း ဖြန့်ဝေထားတဲ့ သတင်းအမှားတွေ ထွက်ပေါ်နေပါတယ်။

အဆိုပါ သတင်းအမှားကို ဩဂုတ်လ ၂၅ ရက်နေ့မှာ ဖေ့စ်ဘွတ်အကောင့်တု ပေါင်းများစွာနဲ့ ဖြန့်ဝေခဲ့ကြတာ ဖြစ်ပြီး အဲ့ဒီ သတင်းအမှားထဲမှာ "ရက်စက်မှု့သရဖူဆောင်း ကော့ကရိတ်အရှေ့တောင်ခြမ်းက KNU တပ်မဟာ ၆ ယုတ်မာရက်စက်မှု့တွေကို နယ်မြေရှင်း တိုက်ခိုက်သုတ်သင်နေတဲ့ တပ်တွေ အဝင်မခံတာ ဒါကြောင်ကိုး KNU တပ်မဟာ၆ သူတို့နယ်မြေထဲ စစ်ကြောင်းတပ်မတော်နဲ့ ကရင်မင်းသားBGFတပ်တွေ ရှာဖွေဖော်ထုတ်ခဲ့ပါတယ်။ သိမ်းပိုက်မိတဲ့ လက်နက်.ခဲယမ်းအသုံး အဆောင်ပစ္စည်းတွေအပြင် လူသတ် မုဒိမ်းကျင့် မြှုပ်နှံထားတဲ့လူသေကျင်းတွေ အများကြီးတွေ့ရတယ် ခန့်မှန်း အလောင်းအရေအတွက် ၅၀၀ ကျော်ခန့် ရှိမည်ဟုခန့်မှန်းရ၏" (မူရင်းရေးသားထားသည့်အတိုင်း) လို့ ရေးသားထားပြီး စစ်တပ်က တပ်မဟာ ၆ PDF စခန်းကို ဝင်သိမ်းခဲ့ကြောင်း၊ ဒီလိုဝင်သိမ်းတဲ့အခါမှာ မတူညီတဲ့ နေရာ ၉ ခုမှာ ပျက်ယွင်းနေတဲ့ အလောင်းပေါင်းများစွာ တွေ့ရကြောင်း၊ တချို့အလောင်းတွေဟာ ဦးခေါင်းတောင် မပါတော့ကြောင်း၊ တချို့ မိန်းခလေး အလောင်းတွေကို အဝတ်မဲ့နဲ့ ကြိုးတုပ် မုဒိန်းကျင့်ကာ သတ်ထားကြောင်း ၎င်း သတင်းအမှားထဲမှာ ရေးသားထားပါတယ်။

မူရင်း ရေးသားဖြန့်ဝေမှုကို ဒီနေရာဒီနေရာဒီနေရာ နဲ့ ဒီနေရာမှာ ကြည့်ပါ။

သတင်းဆန်းစစ်ချက်

လူမှုကွန်ယက်ပေါ်မှာ ဖြန့်ချီထားတဲ့ KNU တပ်မဟာ ၆ နယ်မြေကို စစ်တပ်က သိမ်းယူပြီး သတ်ဖြတ်ထားတဲ့ အလောင်း ၅၀၀ ကျော်တွေ့တယ် ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝါဒဖြန့်ထားတဲ့ သတင်းအမှားဖြစ်ကြောင်း တွေ့ရပါတယ်။

လက်ရှိအချိန်ထိ တပ်မဟာ ၆ နယ်မြေကို စစ်ကောင်စီတပ်တွေက သိမ်းယူနိုင်ခြင်း မရှိသေးပါဘူး။ ဒါပေမယ့် စစ်ကောင်စီရဲ့ တပ်စခန်းတစ်ခုကိုတော့ KNLA တပ်မဟာ ၆ က တိုက်ခိုက်သိမ်းပိုက်ခဲ့တယ်လို့ Karen Information Center – KIC သတင်းဌာနမှာ ဖော်ပြထားပါတယ်။


KIC သတင်းဌာန မှာဖော်ပြထားတဲ့ အကြောင်းအရာကို ဒီမှာ ဖတ်ပါ။

ဒါ့အပြင် ရက်ပိုင်းအတွင်းမှာလည်း KNU တပ်မဟာ ၆ က PDF ၊ Gen Z တွေနဲ့ စစ်ကောင်စီတပ်တွေ တိုက်ပွဲဖြစ်ပြီး PDF ၅၀ ကျော် ကျဆုံးခဲ့တယ် ဆိုတဲ့ သတင်းအမှား ထွက်ပေါ်လာသေးပါတယ်။ အဆိုပါ အကြောင်းအရာ နဲ့ ပတ်သက် KNU နယ်မြေ သတင်းပြန်ကြားရေးအဖွဲ့က သတင်းအမှားဖြစ်တယ်လို့ ထုတ်ပြန်ထားပါတယ်။


ဒူးပလားခရိုင်က ထုတ်ပြန်ချက်ကို ဒီမှာ ကြည့်ပါ။

အဆိုပါ တပ်မဟာ ၆ ထိန်းချုပ်နယ်မြေရောက်ရှိနေသူ တစ်ဦးက Online ပေါ်မှာ ပြန့်နေတဲ့ အကြောင်းအရာတွေဟာ သတင်းအမှားသာဖြစ်ပြီး အားလုံး လုံခြုံစွာ ရှိနေတယ်လို့ Boom Myanmar ကို ပြောပါတယ်။

Claim Review :   လူမှုကွန်ယက်ပေါ်မှာ ဖြန့်ချီထားတဲ့ KNU တပ်မဟာ ၆ နယ်မြေကို စစ်တပ်က သိမ်းယူပြီး သတ်ဖြတ်ထားတဲ့ အလောင်း ၅၀၀ ကျော်တွေ့တယ် ဆိုတဲ့ အကြောင်းအရာကို Boom Myanmar က အချက်အလက် စစ်ဆေးထားပါတယ်။
Claimed By :  facebook
Fact Check :  False
Show Full Article
Next Story