စစ်အာဏာသိမ်းမှုကို တော်လှန်ဘို့ ကလေးတွေကို ဆရာမစည်းရုံးဆိုပြီး ဖြန့်ဝေနေတဲ့ သတင်းအမှား
မန္တလေးတိုင်း စဉ့်ကူးမြို့နယ်ရှိ ဘော်ဒါဆောင်မှ ဆရာမတစ်ဦးက စစ်အစိုးကတော်လှန်ရန် စာသင်ကလေးတွေကို စည်းရုံးနေတယ်ဆိုပြီး လိမ်လည်ရေးသားကာ သတင်းမှားဖြန့်ဝေနေတဲ့အတွက် BOOM က သတင်းဆန်းစစ်ချက် ပြုလုပ်ထားပါတယ်။
ဒီသတင်းမှားကို မင်းကိုကိုဦး ဆိုတဲ့ ဖေစ့်ဘွတ်အကောင့်က ဇန်နဝါရီလ ၅ ရက်နေ့ နံနက် ၁၁ နာရီခန့်က ဖြန့်ဝေခဲ့တာဖြစ်ပြီး ၅ နာရီအတွင် ထပ်ဆင့်ဖြန့်ဝေသူပေါင်း ၅၅၀ ကျော်ရှိခဲ့ပါတယ်။
ရေးသားမှုထဲမှာ "အမြန်ဆုံး များများ ရှဲယ်ပေးကြပါ ခင်ဗျာ။ တပ်မတော် အကြီးအကဲ များ သိရှိရန် ရည်ညွှန်း" ဆိုပြီး တိုင်ကြားမှုပုံစံမျိုးရေးသားထားပြီး စာထဲမှာ "မန္တလေးတိုင်း စဉ့်ကူးမြို့နယ် ×××× ဘော်ဒါဆောင် မှာ နေထိုင်တဲ့ ဆရာမ ××× က စစ်အာဏာကို အလိုမရှိကြောင်းနဲ့ ဆူပူမှုဖြစ်စေရန် လှုံ့ဆော်နေကြောင်း၊ အာဏာသိမ်းတဲ့ စစ်အစိုးရကို တွန်းလှန်ဘို့ စာသင်အရွယ်ကလေးတွေကို စည်းရုံးနေကြောင်း" ရေးသားထားတာပါ။ ရေးသားမှုရဲ့ အောက်ဆုံးမှာလည်း ကျောင်းဆရာပါဝါကို သုံးပြီး ကလေးငယ်တွေကိုသွေးဆောင်နေသော ဆရာမ ×× ကို လိုအပ်သလိုအရေးယူနိုင်ရန် တင်ပြပါသည်လို့ ရေးသားထားကာ အစိုးရရုံးမှားမှာ လုပ်လေ့ရှိတဲ့ မထ္တူကို နိုင်ငံတော် စီမံအုပ်ချုပ်ရေး ကောင်စီ၊ စရတအဖွဲ့ လို့ ထည့်သွင်း ရေးသားထားပါတယ်။
ဒီသတင်းမှားကို ရေးသားဖြန့်ဝေတဲ့ မင်းကိုကိုဦးဆိုတဲ့ ဖေစ့်ဘွတ်အကောင့်ပိုင်ရှင်မှာ စစ်တပ်ကို အားပေးထောက်ခံတဲ့ ပိုစ့်တွေရေးသားလေ့ရှိပြီး စစ်အစိုးရမှ အာဏာသိမ်းခဲ့တဲ့ ဖေဖေါ်ဝါရီလ ၁ ရက် နေ့မတိုင်မီကလည်း စစ်တပ်အာဏာသိမ်းမယ်ဆိုတဲ့ အရိပ်အယောင်ပါတဲ့ ရေးသားဖြန့်ဝေခဲ့တာ တွေ့ရပါတယ်။
သတင်းဆန်းစစ်ချက်
ဒီဖြန့်ဝေမှုနဲ့ ပါတ်သတ်ပြီး BOOM က စဉ့်ကူးမြို့နယ်က ဘော်ဒါဆောင်အချို့ကို ဖုန်းဖြင့် ဆက်သွယ်မေးမြန်းရာမှာ ယခုအချိန်မှာ ကလေးများစာသင်ကြားခြင်း ရှိမနေေကြောင်း နဲ့ ဘော်ဒါဆောင်တွေကိုလည်း ပိတ်ပင်ထားတဲ့အတွက် ဒီလို ကလေးတွေကို စည်းရုံးနေတယ်ဆိုတာ မဖြစ်နိုင်ကြောင်း ပြောဆိုထားပါတယ်။
Claim Review : မန္တလေးတိုင်း စဉ့်ကူးမြို့နယ်ရှိ ဘော်ဒါဆောင်မှ ဆရာမတစ်ဦးက စစ်အစိုးကတော်လှန်ရန် စာသင်ကလေးတွေကို စည်းရုံးနေတယ်ဆိုပြီး လိမ်လည်ရေးသားကာ သတင်းမှားဖြန့်ဝေနေတဲ့အတွက် BOOM က သတင်းဆန်းစစ်ချက် ပြုလုပ်ထားပါတယ်။
Claimed By : Facebook, Website
Fact Check : False
Next Story