KBZ Pay အကောင့်တွေ အပြီးတိုင်ပိတ်သိမ်းတယ်ဆိုတဲ့ သတင်းအမှား

ဒီအကြောင်းအရာကို Ah Nyar Thar Lay ဆိုတဲ့ ဖေစ့်ဘွတ်ပေချ့်မှာ မတ်လ ၁၀ ရက်နေ့မှာ စတင်ဖြန့်ဝေခဲ့တာ ဖြစ်ပြီး ထပ်ဆင့်ဖြန့်ဝေမှု အများအပြားလည်း ရှိနေပါတယ်။

ဖြန့်ဝေရာမှာ 'KBZ pay များအပြီးတိုင်ပိတ်သိမ်းကြောင်းနှင့် အကောင့်ပိုင်ရှင် များဘဏ်သို့ ကိုယ်တိုင်လာရောက်ဖြေရှင်းကြပါရန် စာပို့ထားMarch:10' ဆိုပြီး ရေးသားထားတာပါ။

ဖြန့်ဝေမှုတွေကို ဒီနေရာ၊ ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။

သတင်းဆန်းစစ်ချက်

KBZ Pay အကောင့်တွေ အပြီးတိုင်ပိတ်သိမ်းတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။

ဒီလို အကောင့်တွေ ပိတ်သိမ်းမယ်ဆိုတဲ့ အကြောင်းကို KBZ Pay တရားဝင် ဖေစ့်ဘွတ်ပေချ့်မှာ ကြေညာထားတာမရှိသလို အခြား ကမ္ဘောဇဘဏ်ရဲ့ တရားဝင်ဝက်ဆိုက်နဲ့ မီဒီယာတွေမှာလည်း ထုတ်ပြန်ထားတာ မရှိပါဘူး။

KBZ Pay တရားဝင် ဖေစ့်ဘွတ်ပေချ့် ကို ဒီနေရာ မှာ ဝင်ရောက်ကြည့်ရှု့နိုင်ပါတယ်။

လက်ရှိ ဖေစ့်ဘွတ်ပေါ်မှာ နောက်ပြောင်သလိုလို၊ အတည်ပေါက်ရေးသလိုလိုနဲ့ နိုင်ငံရေး၊ စစ်ရေးအကြောင်းတွေနဲ့ အင်တာနက် အသုံးပြုသူတွေ စိုးရိမ်ထိတ်လန့်စေမယ့် အကြောင်းအရာတွေကို ရေးသားကာ RCS (React, Comment and Share) နဲ့ ပိုက်ဆံရှာနေသူတွေ များပြားလာပါတယ်။

သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။