သရုပ်ဆောင် ဆင်မ ကွယ်လွန်တယ်လို့ လိမ်ညာထားတဲ့ YouTube သတင်း ဗွီဒီယို

သတင်းအမှားဖြန့်ပြီး ဝင်ငွေရှာနေတဲ့ YouTube ချန်နယ်လ် တစ်ခုက ဇာတ်ပို့သရုပ်ဆောင် ဆင်မ ကွယ်လွန်သွားပြီဆိုတဲ့ သတင်းအမှားတစ်ပုဒ်ဖြန့်ဝေခဲ့ပါတယ်။

၎င်း Video ကို Myanmar True news ဆိုတဲ့နာမည်နဲ့ ဖွင့်ထားတဲ့ YouTube channel တစ်ခုက အဲ့ဒီ Video ကို ဩဂုတ်လ ၂၇ ရက်နေ့မှာ တင်ထားတာ ဖြစ်ပြီး နောက်ထပ် Hot News ဆိုတဲ့ နာမည်နဲ့ ဖွင့်ထားတဲ့ Facebook ပေ့ချ်တစ်ခုကလည်း ဒီ Video ကို ပြန်တင်ထားပါတယ်။

Video ဟာ ၁၀ မိနစ်နဲ့ ၅ စက္ကန့်ကြာမြင့်ပြီး သတင်းကြေငြာတဲ့ပုံစံ ပြုလုပ်ကာ နောက်ခံစကားပြော အသံဖိုင်နဲ့ ဓါတ်ပုံတွေကို အသုံးပြုထားပါတယ်။ အသုံးပြုထားတဲ့ ဓါတ်ပုံဟာ သရုပ်ဆောင် ဆင်မရဲ့ ဓါတ်ပုံဖြစ်ပြီး ဓါတ်ပုံပေါ်မှာ "ဦးဆင်မ ဆုံးပြီ" "ည ၇ နာရီ ၊ မျက်ရည်ပါကျတယ်ဗျာ၊ ဦးဆင်မ အလောင်းထုတ်" ဆိုတဲ့ စာတွေ ရေးထားပါတယ်။ ဖေ့ဘွတ်ပေ့ချ်မှာ ဖြန့်ဝေရာမှာလည်း "ဦးဆင်မ ကောင်းရာ ရောက်ပါစေဗျာ" ဆိုတဲ့ စာကို ရေးထားပါတယ်။

Hot News ရဲ့ Facebook ပေ့ချ်မှာ တင်ထားတဲ့ Video ကို Like လုပ်ထားသူ ၃၂၀၀၀ ကျော်နဲ့ ဝင်ရောက်ကြည့်ရှု့ထားသူ ၈ သိန်း ၃ သောင်းကျော် ရှိနေပါတယ်။ Myanmar True News ရဲ့ YouTube မှာတော့ ဝင်ရောက်ကြည့်ရှု့ထားသူ ၁၁၀၀၀ ကျော်ရှိနေပါတယ်။

မူရင်းဖြန့်ဝေမှုကို ဒီနေရာ နဲ့ ဒီနေရာ မှာ ကြည့်ပါ။

သတင်းဆန်းစစ်ချက်

လူမှုကွန်ယက်ပေါ်ဖြန့်ဝေထားတဲ့ ဇာတ်ပို့ သရုပ်ဆောင် ဦးဆင်မ ကွယ်လွန်သွားတယ်ဆိုတဲ့ Video file ကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် လုပ်ကြံဖြန့်ဝေထားတဲ့ သတင်းအတုဖြစ်ကြောင်း တွေ့ရပါတယ်။

ဒီလို Video တွေဟာ ဝင်ရောက်ကြည့်ရှု့သူများရင် YouTube နဲ့ Facebook ကနေ ပြန်ပေးတဲ့ ဝင်ငွေနဲ့ စီးပွားရှာနေကြခြင်းသာဖြစ်ပါတယ်။

သရုပ်ဆောင် ဆင်မဟာ ဩဂုတ်လ ၂၄ ရက်နေ့ ညပိုင်းက နေအိမ်မှာရှိနေစဉ် စစ်ကောင်စီတပ်တွေရဲ့ ဖမ်းဆီးထိန်းသိမ်းခြင်းကို ခံခဲ့ရတာဖြစ်ပါတယ်။ သရုပ်ဆောင်ဆင်မ ဖမ်းဆီးထိန်းသိမ်းခံရတဲ့အကြောင်း ဧရာဝတီသတင်းဌာနက ဖော်ပြထားတဲ့ သတင်းကို ဒီမှာဖတ်ပါ။

ဒါ့အပြင် သတင်းအမှားဖြန့်သူတွေ ပြုလုပ်ထားတဲ့ Video မှာ ဆင်မအကြောင်း တစ်လုံးမှ မပါဝင်ပါဘူး။ တခြား ဗုံးပေါက်တဲ့ သတင်းတွေ၊ သတင်းအဟောင်းတွေကိုသာ ဖော်ပြထားပြီး ဓါတ်ပုံနဲ့ သတင်းခေါင်းစဉ်လိမ်ညာရေးပြီး လူစိတ်ဝင်စားမှုရရှိအောင် လိမ်ညာထားခြင်း ဖြစ်ပါတယ်။

Claim Review :   လူမှုကွန်ယက်ပေါ်ဖြန့်ဝေထားတဲ့ ဇာတ်ပို့ သရုပ်ဆောင် ဦးဆင်မ ကွယ်လွန်သွားတယ်ဆိုတဲ့ Video file ကို Boom Myanmar က အချက်အလက် စစ်ဆေးထားပါတယ်။
Claimed By :  facebook, YouTube
Fact Check :  False
Show Full Article
Next Story