စစ်ကောင်စီတပ်ဖွဲ့ဝင် အလောင်းတွေကို အမှိုက်အိတ်ထဲထည့် စွန့်ပစ်သွားတဲ့ ဖြစ်စဉ်ကို သတင်းမှားအဖြစ် ရေးသားဖြန့်ဝေ
ယာယီတပ်ရင်းမှူး ဗိုလ်မှူး သန်းဝင်းထွန်းအလောင်း အပါအဝင် တပ်ဖွဲ့ဝင်တွေရဲ့ အလောင်းတွေကို အမှိုက်အိတ်အမည်းနဲ့ ထုပ်ပြီး သင်္ချိုင်းဇရပ်တွင် ဖြစ်သလို စွန့်ပစ်သွားတဲ့ ဖြစ်စဉ်ကို သတင်းအမှားဖြစ်တယ်ဆိုပြီး စစ်တပ်ထောက်ခံသူတွေက လူမှုမီဒီယာပေါ် ဖြန့်ဝေနေပါတယ်။
ဖြန့်ဝေမှုတွေကို အောက်တိုဘာလ ၂၂ ရက် နံနက်ပိုင်းမှာ စစ်တပ်ထောက်ခံသူတွေရဲ့ ဖေစ့်ဘွတ်ပေချ့်တွေနဲ့ ဂရုတွေမှာ ရေးသားဖြန့်ဝေနေတာဖြစ်ပြီး "ယာယီတပ်ရင်းမှူး ဗိုလ်မှူး သန်းဝင်းထွန်းအလောင်း အပါအဝင် တပ်ဖွဲ့ဝင်များ၏ အလောင်းများကို အစိုးရက အမှိုက်အိတ်အမည်းဖြင့်ထုပ်၍ သင်္ချိုင်းဇရပ်တွင် ဖြစ်သလို စွန့်ပစ်သွားဆိုသည်မှာ သတင်းအမှားသာဖြစ်ကြောင်းနဲ့ အဆိုပါ ဖြစ်စဉ်မျိုး ဖြစ်ပွားမှုမရှိခဲ့သလို ဗိုလ်မှူးသန်းဝင်းထွန်း ဆိုသူလည်း မရှိကြောင်း" ရေးသားဖြန့်ဝေနေတာပါ။
ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
သတင်းဆန်းစစ်ချက်
ယာယီတပ်ရင်းမှူး ဗိုလ်မှူး သန်းဝင်းထွန်းအလောင်း အပါအဝင် တပ်ဖွဲ့ဝင်တွေရဲ့ အလောင်းတွေကို စစ်ကောင်စီက အမှိုက်အိတ်အမည်းနဲ့ ထုပ်ပြီး သင်္ချိုင်းဇရပ်မှာ ဖြစ်သလို စွန့်ပစ်သွားတယ်ဆိုတဲ့ သတင်းကို အောက်တိုဘာလ ၂၂ ရက်နေ့ နံနက် ၁၀ နာရီခွဲခန့်က Khit Thit Media နဲ့ RISE News သတင်းဌာနတွေမှာ ဖော်ပြထားခဲ့ပါတယ်။
ခေတ်သစ်မီဒီယာက ဖော်ပြထားတဲ့ သတင်းထဲမှာ "ကျနော်တို့ ရတဲ့သတင်းအချက်အလက်က အလောင်းတွေကို သံဖြူဇရပ်ဘက်က သင်္ချိုင်းဇရပ်တစ်ခုမှာ လာချထားတယ်၊ စစ်ကောင်စီဘက်က လုပ်မယ့် နောက်ဆက်တွဲ အကြောင်းအရာကိုတော့ မသိသေးဘူး" လို့ ပြောကြားထားတဲ့ KNU သတင်းနှင့်ပြန်ကြားရေး တာဝန်ရှိသူတစ်ဦးရဲ့ ပြောစကားကို ကိုးကားဖော်ပြထားခဲ့ပါတယ်။
ဒါ့အပြင် အောက်တိုဘာလ ၂၀ ရက်နေ့ ညပိုင်းက ဘုရားသုံးဆူ-သံဖြူဇရပ် ကား လမ်းပေါ်ရှိ လွတ်ရှမ်းကျေးရွာအနီးမှာ ဖြစ်ပွားခဲ့တဲ့ စစ်ကောင်စီနဲ့ KNLA တပ်တွေရဲ့ တိုက်ပွဲအတွင်း စစ်ကောင်စီဘက်က ၁ ဦးသေဆုံးကာ ဗိုလ်မှူး ၁ ဦးအပါအဝင် ၆ ဦး ဒဏ်ရာရရှိတဲ့အကြောင်း နယ်မြေခံ ကရင်အမျိုးသားလွတ်မြောက်ရေးတပ်မတော် KNLA ရဲ့ သတင်းရင်းမြစ်ကိုလည်း ကိုးကားဖော်ပြထားတာ တွေ့ရပါတယ်။