နိုဝင်ဘာလ ၁၉ ရက်နေ့က အင်ဒို-မြန်မာနယ်စပ်မှာ ဖြစ်ပွားခဲ့တဲ့ ရွှေချောင်း ၆၆ ကီလိုဂရမ် ဖမ်းဆီးမှုဖြစ်စဉ်ကို ရည်ညွှန်းရေးသားနေတဲ့ ဒီသတင်းကို လူမှုမီဒီယာတွေပေါ်မှာ ပြန်လည်ရေးသားဖြန့်ဝေနေတာ ဖြစ်ပါတယ်။
ရေးသားထားရာမှာ "မြန်မာဘက်က မှောင်ခို တင်ပို့တဲ့ ရူပီးကုဋေ ၃၀ ကျော် တန်ဖိုးရှိ ရွှေချောင်းတွေ အိန္ဒိယမှာ ဖမ်းမိကြောင်း၊ အိန္ဒိယ အခွန်အကောက်ဆိုင်ရာ ထောက်လှမ်းရေး ညွှန်ကြားမှု ဦးစီးဌာန (DRI) က မြန်မာနိုင်ငံက တစ်ဆင့် အိန္ဒိယနိုင်ငံ အတွင်းကို မှောင်ခို တင်သွင်းတယ်လို့ သံသယရှိတဲ့ ရူပီး ကုဋေ ၃၀ တန်းဖိုးရှိတဲ့ ရွှေချောင်း ၆၆ ကီလိုဂရမ် ကျော်ကို နိုဝင်ဘာလ ၁၉ ရက်နေ့က သိမ်းဆည်းရမိခဲ့ပြီး လူ ၄ ဦးကို ဖမ်းဆီးခဲ့တယ်လို့ The Hindu သတင်းမှာ ဖော်ပြထားကြောင်း၊ သတင်းအရ ကုန်တင်ကား ၂ စင်းကို ရပ်တန့် စစ်ဆေးရာမှာ ကားရဲ့ ဆီ သိုလှောင်ကန်ထဲကနေ ရွှေချောင်း ၄၀၀ ကို တွေ့ရှိခဲ့တာဖြစ်ကြောင်း၊ ယခုနှစ်ထဲမှာ အာဏာပိုင်တွေဟာ အိန္ဒိနိုင်ငံရဲ့ နေရာဒေသ အသီးသီးမှာ ရွှေကီလိုဂရမ် ၁၇၀၀ ကျော် သိမ်းဆည်းရမိခဲ့ပြီး ရွှေအများစုဟာ အိန္ဒိယ – မြန်မာ နယ်စပ် မြန်မာဘက်က မှောင်ခို တင်သွင်းလာတာလို့ သတင်းက ဖော်ပြကြောင်း" တွေ ရေးသားထားတာပါ။
ရေးသားဖြန့်ဝေမှုတွေကို ဒီနေရာ၊ ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
သတင်းဆန်းစစ်ချက်
ဒီသတင်းကို ဆန်းစစ်ကြည့်ရာ နိုဝင်ဘာလ ၁၉ ရက်နေ့က အင်ဒို-မြန်မာနယ်စပ်မှာ ဖြစ်ပွားခဲ့တဲ့ ရွှေချောင်း ၆၆ ကီလိုဂရမ် ဖမ်းဆီးမှုမှာ မှန်သော်လည်း မြန်မာဘက်က မှောင်ခိုသွင်းတယ်ဆိုတဲ့ အချက်၊ အိန္ဒိယ အခွန်အကောက်ဆိုင်ရာ ထောက်လှမ်းရေး ညွှန်ကြားမှု ဦးစီးဌာန (DRI) က မြန်မာနိုင်ငံက တစ်ဆင့် အိန္ဒိယနိုင်ငံ အတွင်းကို မှောင်ခို တင်သွင်းတယ်လို့ သံသယရှိတယ်လို့ ပြောတယ်ဆိုတဲ့ အချက်နဲ့ ဖြစ်စဉ်မှာ လူ ၄ ဦးကို ဖမ်းဆီးခဲ့တယ်လို့ The Hindu သတင်းမှာ ဖော်ပြထားတယ်ဆိုတဲ့ အချက်တွေဟာ မှားယွင်းနေပါတယ်။
ဒီဖြစ်စဉ်နဲ့ ပါတ်သတ်တဲ့ သတင်းတွေကို Hindustan Times သတင်းဌာန အပါအဝင် အိန္ဒိယအခြေစိုက် သတင်းဌာနတွေမှာ ဖော်ပြခဲ့ပါတယ်။
နိုင်ဝင်ဘာလ ၂၀ ရက်နေ့က Hindustan Times သတင်းဌာနမှာ ဒီအကြောင်းအရာ သတင်းကို ဖော်ပြခဲ့ရာမှာ အင်ဒို-မြန်မာ နယ်စပ်လို့သာ ရေးသားထားတာဖြစ်ပြီး သတင်းထဲမှာ အကောက်ခွန်ဦးစီးဌာန (DRI) က မြန်မာနိုင်ငံက တစ်ဆင့် အိန္ဒိယနိုင်ငံ အတွင်းကို မှောင်ခို တင်သွင်းတယ်လို့ သံသယရှိတယ်လို့ ပြောဆိုတဲ့အကြောင်း ရေးသားထားခြင်း မရှိပါဘူး။
အလားတူ အခြားသတင်းဌာနတွေရဲ့ ဖော်ပြမှုမှာလည်း DRI က မြန်မာနိုင်ငံကတဆင့် မှောင်ခိုတင်သွင်းတယ်ဆိုတဲ့ အချက်ကို ရေးသားဖော်ပြထားခြင်း မရှိပါဘူး။
သတင်းတွေကို ဒီနေရာ၊ ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
အိန္ဒိယနိုင်ငံ သွယ်ဝိုက်အခွန်နှင့်အကောက်ခွန်ဗဟိုဘုတ်အဖွဲ့(CBIC) ကလည်း ဒီအကြောင်းနဲ့ပါတ်သတ်ပြီး CBIC ရဲ့ တရားဝင်တွစ်တာအကောင့်မှာ နိုဝင်ဘာလ ၁၉ ရက်နေ့က ရေးသားထားခဲ့ပါတယ်။
CBIC ရဲ့ ရေးသားထားမှုမှာလည်း မြန်မာနိုင်ငံဘက်မှ မှောင်ခိုတင်သွင်းတယ်လို့ ပြောဆိုမထားပဲ ဖမ်းဆီးထိမ်းသိမ်းခံရသူမှာ ၅ ဦးဖြစ်တယ်လို့ ဖော်ပြထားပါတယ်။
CBIC ရဲ့ တွစ်တာအကောင့်မှာ ဖော်ပြထားမှုကို ဒီနေရာ မှာ ကြည့်ရှု့နိုင်ပါတယ်။