Dark Shadow အဖွဲ့ဝင်တွေကို ရန်ကုန်၊ ကြည့်မြင်တိုင် တစ်ဖက်ကမ်းက အလပ်ချောင်းကျေးရွာထဲမှာ စစ်ကောင်စီက ဧပြီလ ၂၇ နေ့က ဝင်ရောက်ဖမ်းဆီးခဲ့တာဖြစ်ပြီး ပစ်ခတ်ဖမ်းဆီးမှုကြောင့် အဖွဲဝင်တစ်ဦး နေရာမှာတင် သေဆုံးခဲ့ကြောင်းနဲ့ နောက်တစ်ရက်မှာ ကျန်အဖွဲ့ဝင်အားလုံးကို ရန်ကုန်မြို့ စစ်ဆေးရေး ဂိတ်မှာ ဖမ်းဆီးခဲ့ပြီး ပစ်ခတ်ခံရလို့ အကုန်ကျဆုံးသွားတယ်လို့ ရန်ကုန်က မြို့ပြ ပြောက်ကျားအဖွဲ့အသီးသီးက ထုတ်ပြန်ခဲ့တာပါ။
မြို့ပြ ပြောက်ကျားအင်အားစုတွေရဲ့ ထုတ်ပြန်ချက်တွေနဲ့အတူ "ရန်ကုန်အဖမ်းခံရတဲ့ အဖွဲ့မှ ကလေးများအားလုံးကျဆုံးကြောင်း၊ အဖမ်းခံရတဲ့ ကလေးတစ်ဦးရဲ့ ဖခင်တစ်ဦးပါ သေဆုံးကြောင်းနဲ့ အလောင်းပြန်ထုတ်ယူခွင့် မပြုကြောင်း" တွေ ပျံ့နှံ့ခဲ့ပါတယ်။
သတင်းဆန်းစစ်ချက်
Dark Shadow အဖွဲ့ဝင်အားလုံး ကျဆုံးခြင်း၊ ဖမ်းဆီးခံရခြင်း မရှိကြောင်းနဲ့ စစ်ကောင်စီလက်က လွတ်မြောက်ပြီး Cobra စစ်ကြောင်းမှာ တပ်ဖွဲ့ဝင်တွေအဖြစ် ပါဝင်နေပြီဆိုတဲ့ ရန်ကုန်ခေတ်သစ်သတင်းဌာနရဲ့ သတင်းတစ်ပုဒ်ကို Support to CDM Myanmar ရဲ့ ဖေစ့်ဘွတ်ပေချ့်မှာ မေလ ၁၁ ရက်နေ့ ညပိုင်းမှာ ဖော်ပြလာပါတယ်။
သတင်းထဲမှာ Dark Shadow ခေါင်းဆောင်ကိုချမ်းငြိမ်းသူကို ကိုးကားထားပြီး ၎င်းဖြေကြားထားတဲ့အချက်ထဲမှာ "ကျနော်တို့ စစ်သားတွေ ဝင်လာတာတွေ့တယ်။ အဲဒီမှာ ကျနော်တို့က မသင်္ကာလို့ ဖောက်ခွဲရေး ပစ္စည်းတွေကို ရွှေ့နေတုန်း သူတို့ဝင်လာတာတွေ့တော့ ပစ္စည်းတွေ အကုန်ချပြီး ထွက်ပြေးတယ်။ သူတို့က အားလုံးကို သေနတ်နဲ့ လိုက်ပစ်တယ်။ မြောင်းတွေထဲဆင်းပြေး၊ အိမ်သာကျင်းတွေထဲအထိ ဝင်ပုန်းရတယ်။ ကိုယ့်နားက ကျည်တွေ ထွက်သွားတာ ဝီကနဲ ဝီကနဲပဲ။ အဲဒါ ကျနော်တို့ တစ်ဖွဲ့လုံး လွတ်ပါတယ်။ မဆိုင်တဲ့သူတွေတချို့ အဖမ်းခံရတယ်။ အခုကျနော်တို့ အားလုံး လွတ်မြောက်နယ်မြေရောက်ပါပြီ။ Cobra စစ်ကြောင်းမှာပါဝင်ပြီး စစ်အာဏာရှင်စနစ်ကို ဆက်ပြီး တော်လှန်တိုက်ခိုက် သွားမှာပါ။ ကျနော်တို့ သေပြီး အဖမ်းခံရပြီဆိုပြီး ဝမ်းနည်းနေတဲ့ ပြည်သူတွေကို အသိပေးချင်တာပါ" လို့ ပြောဆိုတယ်လို့ ဖော်ပြထားပါတယ်။
အဆိုပါသတင်းကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
ဒါ့အပြင် ကိုချမ်းငြိမ်းသူက သူ့ရဲ့ ဖေစ့်ဘွတ်အကောင့်မှာလည်း "Dark Shadow(ygn) မြို့ပြပျောက်ကြားအဖွဲ့ ပြန်လာပြီ" လို့ မေလ ၁၁ ရက်နေ့ ည ၇ နာရီဝန်းကျင်မှာ ရေးသားဖြန့်ဝေခဲ့ပါတယ်။
ပိုစ့်ကို ဒီနေရာ မှာ ကြည့်ရှု့နိုင်ပါတယ်။